國泰無中招 不必太興奮
2019年03月14日
中美不斷放出貿易談判有機會達成協議嘅消息，但市場焦點就暫時轉咗去波音737 MAX空難同引起嘅後遺症，令美股氣氛受到影響。
特區政府噚日晏晝先禁止呢個型號嘅飛機進入香港，俾人炮轟後知後覺。由於各國先後禁止呢個型號嘅飛機
入境，就算美國政府力撐拒絕禁飛，當地機組人員仍然對安全表示關注。737 MAX係波音主要型號飛機，涉及定單數量超過5000架，事態發展令公司股價跌完再跌，甚至波及當地航空股。不過，隨住股價持續反映，相信對美股影響會慢慢消化。有分析認為，國泰(293) 無買呢隻飛機，其他航空公司受停飛影響，或者會令國泰得益。
業績好轉只宜候低吸
國泰喺選擇航機機種，作風一向保守，好似空巴嘅A380巨無霸推出時引起哄動，競爭對手好快落單訂購，國泰就一於懶理先行觀望，事後A380因為太大架，市場唔太受落，國泰就完全唔受影響。至於737 MAX事件，或會令國泰略有得益，但呢個屬於一次性影響，對估值影響有限，投資者唔使過份興奮。
國泰股價噚日逆市上升2.3%，收報13.48元，都係近年高位。國泰股價硬淨，相信同公司宣佈轉虧為盈關係較大。集團截至2018年12月31日止，全年業績轉虧為盈，股東應佔溢利23.45億元，每股基本盈利59.6仙，第二次中期息20仙。國泰受期油合約虧損衝擊捱咗幾年，股價一直低迷。舊年底陸羽仁開始對公司評價略為提升，主要係期油合約影響慢慢過去，加上香港航空財政受壓減少競爭，國泰股價近期都有好轉。對於最新業績，陸羽仁認為算係中規中矩，以現價計市盈率22倍，估計未來盈利仍有增長空間，但唔好睇得太樂觀。
大摩力撐A股未過熱
國泰O依家有高估值，主要係盈利處於相對低位，過去公司高峰期可以賺約50億元，若按呢個數計，市盈率等如11倍左右。航空業係成熟行業，特別喺O依家資訊發達嘅年代，好多嘢可以遙距控制，商務飛行需求減少，搭飛機好多時係去玩，未必肯畀錢搭商務或者頭等。國泰仲有個因素，就係生意一好，爭取勞工權益嘅聲音又會回歸，所以好難再有太高估值。樂觀啲睇，未來股價或者可以溫和跑贏大市，但幅度唔會太多，若然有興趣落注，最好等股價回調時低吸再博高沽。
外圍股市波動，內地股市近日反覆，A股晏晝顯著下挫，深圳創業板一度挫逾5%，上證指數收報3026點，跌33點，跌1.1%。深成指數都低開低走，收市報9592點，跌249點。
內地股市回吐，港元轉弱要金管局入市，但港股跌唔算多，全日最多挫230點，見28690點全日低位，恒指收跌113點，報28807點；國指收跌60點，報11405點。雖然上證指數喺3000點樓上開始有阻力，大摩噚日就發表報告力撐，指目前市場情緒指標係51%，2015年泡沫時期峰值係100%，認為市況遠遠未到「過熱」狀態，覺得仲有15%上漲空間。
喺回調市中，表現較惹人關注嘅係5G概念股大挫。據《華爾街日報》報道，美國圍堵華為加入海底電纜呢個新戰場，中興通訊(763) 午後跌勢加劇，收挫7.4%，報23.15元；長飛光纖光纜(6869) 瀉近10%，報22.05元，該股俾富瑞發表報告唱淡，野村大劈目標價37%；京信通信(2342) 跌7%，報1.84元；中國通信服務(552) 報7.52元，跌2.3%；摩比發展(947) 報1.16元，跌2.5%。
另外，內地互動廣告公司豆盟科技(1917) 今日喺主板掛牌，上市前夕股價喺暗盤市場造好，暗盤開報0.51元，收報0.55元，較招股價0.41元升34%。每手一萬股，帳面賺1400元。
陸羽仁
金融High Tea 舊文
來源 source: http://hdfin.stheadline.com