【大茶飯】誠實的大嶼地主（青冰）
無論各戰友是否支持「明日大嶼」的計劃，相信都feel到事在必行，究竟市民是否最終的受益者，大家心裡有數，青冰唔識政治，只懂股票，除了肯定有些中資公司會受惠外，即時都會聯想到大嶼山地主香港興業(0480)，不過這老牌的華資股可謂極之難玩，單看股價長期折讓就知
，今年雖然上升24%，但現時市賬率仍只有0.34，換言之一係市場走寶，一係就市場仍然覺得佢伏味濃。
要玩華資股，機會成本都頗高，佢係唔炒的話，個市點樣雞犬皆升，佢哋都會原地踏步，今次提起青冰的興趣去寫，緣於見到大股東誠實的身體有動作。
查氏家族在兩星期前增持幾天，全在場內，睇返以往的記錄，在場內增持要數到去2012年4月，當時的股價約在2.3元，增持後都先震一震，年尾最高炒到3.4元，不過又留意返，當年增持的用錢唔多，加埋只有兩百萬元左右。3月的增持有三天，第一天買貨約在4.25元，第二天大概是4.35元，兩天買了94萬股，而在3月22日，一口氣買了812萬股，斥資3645萬元，翻查當天的成交，共有1079萬股，當中有689萬股大手上板，照咁睇，當日大手上板接貨的是查家，而這812萬股，就佔當日的75%成交。
如果戰友唔善忘，應該記得發展局在兩星期前有記者會，交代明日大嶼的工程開支及賣地回報估算，日子就是3月19日。查家第一天增持，就是3月20日，可謂夾得剛剛好，真係好誠實，政治敏感度極高，即使係人都知3月19日有記者會，查家出手都揀在記者會後，以免被醒目的記者再抽水。咁究竟兩者有冇關係，定真係純巧合呢，青冰也不敢下結論，留畀戰友自行判斷。
青冰對那個明日大嶼冇乜興趣，亦冇詳細跟進，不過相信都有排搞，一千劃都未有一撇，究竟個海點填，要頂住幾多反對聲音，難以量化，不過對大嶼山發展有正面的作用，應是市場共識，對香港興業有乜著數，大家都係靠估，但肯定嘅係，未來一有甚麼新的相關消息，或地產發展藍圖，市場即時會想起香港興業，有理無理都會炒一浸，但提返你此股甚難玩，高追伏味甚濃，等靜下來先撈吧。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com