智取大市 - 晉佳 2019年4月3日
智取大市：騰訊輸不起美團 - 晉佳
美團不繼燒錢，要浴火重生，就要睇無人駕駛幾時出場。 資料圖片 適中字型 較大字型
騰訊（700）持有美團（3690）19.24%股權，價值相當對騰訊市值1.6%，股價一日波幅都跌咗去，財務角度睇，實在輸得起，但唔押注喺內地外賣兼旅遊平台龍頭，呢個風險佢就輸唔起了。
好多人鬧美團冇投資價值，睇唔到盈利能力。美團年初將外賣分成費率由15%調升至22%，簡直同謀殺食肆合作夥伴冇分別，喺餓了麼減費下失市佔率，亦等同割自己一刀。美團舊年經營虧損110億人仔，淨有形資產得526億，經營及投資活動負現金流326億，舊年上市籌約300億一年就燒曬，若保持燒錢速度，唔使兩年就變負資產，加費率實在逼於無奈，犧牲市佔率大件事，但續命更大件事。
喺中國，Day 1成為壟斷級別龍頭，只要唔執笠，就可以千秋萬世，近年少有打破呢個宿命。美團嘅希望，唔難理解，等到無人駕駛出場，人手大減，同時可以運送其他消費品形成協同效應，市值就可以係3,000億嘅唔知幾多倍。要財務上捱到，兼且一直成功抵抗餓了麼，就係長遠最大任務，賺錢？可見將來係次要，嚟緊每次業績股價都有壓力。要浴火重生，就睇呢隻真正5G概念股要等無人車等到幾時了。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com