炒醫保要兼睇基本面
2019年04月03日
中港股市本周造好，當中一個前奏，係上周五(3月29日)傍晚一則假冒新華社記者發佈的「4月1日起降準」的謠言，在微信群組流傳，人民銀行辦公廳迅速出面澄清。雖然係咁，似乎都對內地市場氣氛造成影響，人行就此事正式致函公安機關，請求對編造
發佈虛假資訊依法查處。A股昨日走勢稍為反覆，上證指數收報3176點，升0.2%；深成指數收報10260點，跌0.1%。
港股全日大部份時間表現牛皮，但仍能連漲六個交易日，恒指高見29736點，再創去年6月21日以來新高，收市升62點，報29624點，六日連漲1101點。國指則跑輸大市，收降10點，報11546點，成交金額1080億元。
宏利股價連漲六日
領展(823) 、煤氣(003) 及友邦(1299) 三股盤中再創新高。友邦高見80.8元，收升1.1%，收報80元，亦是連漲六個交易日。今個星期起，納稅人如果買自願醫保，就可扣減個人入息稅，每年度最高扣稅額為8000元，合共扣稅額上限為6萬元。如以最高稅階15%計，最多可慳稅9000元。究竟扣稅多少，既同投保額有關，又同納稅額有關，計到盡若保費為8000元，高收入打工仔最多可減1200元。喺政策實施前，已經見到有保險公司力谷廣告，希望搶客。中環茶友關心嘅係，政策對保險股有無好處。
本港醫療費用高昂，而且加幅驚人，有茶友好不滿咁話，政府唔大力輸入醫護人員，起咗醫院都無用，現在推自願醫保，市民買多點保險，醫生又收多點，最後對市民都無益。茶友滿腹牢騷，現實就係醫生變了地產商以外最大的利益團體，暫時看不到政府有政治意志同能力去打破，所以推出自願醫保去止住咳先。究竟自願醫保能否益到保險股？首先考慮當然係間公司要喺本地有做生意，例如好似友邦(1299) 同宏利(945) ，同時仲要佔一定比例先有用，內險股喺香港市場佔比好細，基本上唔會受惠。
聽完做保險管理層嘅分析，現時政府推自願醫保扣稅，好難估計有幾多人因此會投保。因為扣稅雖然有好處，說到底都不是有真銀落袋，最終都係要消費者覺得有投保需要先得，現在保險公司大做宣傳，多少有點係利用呢個理由，推廣自願投保的意識，希望移風易俗，日後會有更多人自願投保，所以短期利益未必好大，長遠就有正面作用。
按照管理層呢個說法，自願醫保有利本地保險股，但不會是即時好有刺激，所以揀股仲係要由基本因素着手。兩隻大型保險股，宏利海外業務比重多，友邦就主力中港同東南亞，醫保係公司香港業務強項，後者應該受惠會較明顯。友邦去年受環球市場波動影響，盈利25.9億美元，按年大跌六成；不過，新業務價值升兩成三，好過市場預期。
同時集團年初獲得批覆，在天津市和河北省石家莊市籌建營銷服務部。簡單嚟講，友邦近年生意穩定增長，股價能夠長期跑贏大市，過去經驗係市場風高浪急時，追貨會遇到股價回頭，需要捱價，等一輪又會有甜頭。陸羽仁一向對這隻股份有好感，現在股價逼近80元大關，呢類長期增長型股份宜耐心持有，藉好消息炒作，只能當係錦上添花。
股仔百仕達有異動
高盛講到濠賭股，估計呢類股份短期股價較為波動，由於現時濠賭股市價，普遍處於中期周期估值，相信股價未反映今年稍後賭收復甦預期，故該行對濠賭股仍然正面看好。濠賭股昨日受追捧，銀娛大升4%，收報58.95元；金沙中國(1928) 升2.05%，收報42.3元；新濠國際(200) 升2%。另外，股仔百仕達(1168) 急升，不排除係大股東家族參與的眾安獲發虛擬銀行牌，所以引來炒作。
陸羽仁
金融High Tea - 陸羽仁 舊文
來源 source: http://hdfin.stheadline.com