智取大市 - 晉佳 2019年5月20日
馬上成為壹會員
會員註冊/登入
【智取大市】5G概念遠未見盡 - 晉佳
美團係食到應5G概念嘅公司，以自駕車進行無人配送營運模式，為美團帶來無限憧憬。 資料圖片 適中字型 較大字型
美團（3690）近期逆市升，大行接連唱好，預期出年轉盈。以目前估值，單計轉盈因素當然唔足夠支持股價強勢，背後嘅意義，係封蝕本門再鞏固市場領導地位，加上較預期快嘅自駕車發展進度，令美團利用自駕車進行無人配送變得更具可測性，呢個憧憬成立的話，股價就絕未止步。
如果美團轉盈在望，佢同餓了麼競爭嘅本錢便增加，屆時好多公司選擇同美團合作，餓了麼最終淪為服務阿里系內業務嘅公司，潛力遠較美團為低。
如果話鐵塔（788）係5G概念股，美團應該係食到應5G概念嘅公司。當然，美團稍後公佈嘅季績絕對左右短期股價表現，但只以短線眼光去睇美團，就實在有點浪費。
唔少周期股由高位快速下跌，開始有點吸引，距離大手撈底則仍需觀察。4月至今高位跌兩成嘅銀娛（027），不失為穩健之選。賭股本來屬優質周期股板塊，有經營正現金流，估值相對一般周期股稍高亦合理。
濠賭股近年除派息外，亦利用回籠資金嚟投資海外賭業，帶嚟輕微增長機會。雖然銀娛喺菲律賓長灘島項目舊年被叫停，但喺澳門賭枱飽和下，投資海外係必然趨勢。
賭收略遜預期，加上市況不就，令銀娛短期急跌。過往經驗多次反映，呢啲因素對於賭股只呈現一時三刻負面影響，銀娛個半月高位跌兩成，相信逢低吸機會已到。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com