【智取大市】抵制掀起白色恐怖 - 晉佳
適中字型 較大字型
星期六日維持一貫緊張氣氛，截至執筆時，最大單係大陸抵制國泰（293）行動，至於滙控（005）一星期內就有兩位高層離任。呢兩間大企業，大陸香港業務比例高，本周齊齊有非一般事件發生。
國泰事件明顯出現白色恐怖，逼使企業懲罰曾經被捕嘅示威者，未審先判，令部份上班族怕冇咗份工、而唔敢喺反對通知書之下繼續上街，部份人相信連行近示威區都唔敢。
國泰第二大股東係國航（753），第一大股東係英資太古（019），要注意，假如中資陸續抵制國泰，亦可能影響英國5G採購華為設備嘅決定，講緊英國5G立場仍然舉棋不定。國泰跪低後，大陸懲罰效果已達成，照計不必窮追猛打。
睇恒指成份股，中港比重同時重嘅股份，主要係國泰同滙控，至於九倉置業（1997）等收租股就係自由行消費概念，固然會害怕被捲入抵銷行動，企業面對潛在抵制時嘅反應，會視乎中港收益多少而定，合理不過。
還記得Nike早早同支持「反送中」嘅日本設計師割席，就係一大例子，就算失去香港市場，亦不容大陸市場動搖，於是用身體取代言語表態，多一事不如少一事，用最快方式完結輿論，至少新聞層面再沒有發酵價值，我等新聞從業員冇嘢可寫，災難自然唔會咁易發生。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com