智取大市 - 晉佳 2019年9月13日
【智取大市】傳統股反彈別高追 - 晉佳
港股近期增長股受壓、傳統股大反彈，呢個時候應該趁調整買有基本因素改進能力股份。 資料圖片 適中字型 較大字型
資金近期從內需等等嘅受歡迎強勢板塊，流入去傳統弱勢板塊。回想起當初點解有批股份長期跑贏、有批股份長期跑輸？理由就係前一批股份有長期基本因素改進能力，後一批係冇改進甚至有倒退問題，喺港股當中，絕大部份股份一係只跟隨周期上落、一係就基本因素不斷惡化，於是造成長期強弱懸殊。好似最近咁，增長股受壓而傳統股大反彈，呢個時候係趁調整買有基本因素改進能力嘅股份？定係高追基本因素向下嘅股份？答案好簡單，肯定是前者。
當一隻股份嘅基本因素改進能力確立，初期係會有收貨階段，呢段時候可能係市況欠佳，形成有低位去買，然後市況一好轉，股價便逐級上升，去到最後升勢加快。李寧（2331）就係好例子，舊年率先出現炒鞋，證明基本因素開始改進，然後業績大升之時，股價已升兩倍。
通常一間公司基本因素持續改善，至少係一兩年貨仔，而有咗投資者支持、有品牌效應，生意嘅改進周期亦可以拉長，盈利保持增長。唔好睇小呢種情況，就似多年前舜宇（2382）為例，由手機開始有鏡頭影相，做埋拍片，然後去到雙鏡頭，現時三鏡頭，足夠股價進入近10年高潮。增長股無啦啦齊齊轉弱，一定唔係單一公司出現問題，反而證明係撈貨機會。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com