港交所高攀跌價候低吸
2019年09月13日
香港亂局未定，港交所(388) 就有理無理照搞大動作，宣佈併購倫交所，消息公佈後中環茶友議論紛紛，有人讚好亦有人睇淡。陸羽仁即時反應係對短期股價有壓力，皆因大家擔心一旦成功，股份數量大增，獲利回吐壓力會唔細。
港交所想吞
併倫交所，中環茶友中有拍手叫好者，大讚行政總裁李小加夠魄力，認為今次行動必定同中央打過招呼，獲得北京肯定，若然成功就為國家立咗大功。茶友中亦有持相反意見者，則認為此舉好大喜功。現時香港「立立亂」，英國投資者點會接受港交所換股。從股東角度而言，之前港交所收購倫敦金屬交易所(LME)，根本只係滿足管理層做大嘅滿足感，對股東回報有限。英國人一向係密底算盤，好嘢唔會賣畀你，賣畀你只貴不平，又何必要好高騖遠？
併購外界普遍看淡
港交所出手併購倫交所，先唔講好壞，淨係睇成事機會其實唔高，因為過去德國交易所多次提過迎娶倫交所，最後都被反對。現在係中國境內嘅交易所要買，放行機會又會有幾大呢？從出價而言，今次建議有相當部份係用新股作價，若然股價回落，建議吸引力即時大減，對賣方倫交所而言，條數就好難計。
陸羽仁對今次成功機會存疑，不少大行都有相同看法。美資花旗發表報告指，直指今次合併面臨較高監管障礙，即時將該股評級下調至「沽售」，目標價大削26.3%，至210元。另一間大行摩根士丹利就申報，係倫交所今次交易的財務顧問，因此暫停對港交所評級及目標價，但提醒交易前提條件之一是，倫交所不可以再進行另一宗與Refinitiv交易，關鍵日期為10月9日，即港交所要在不遲於當日下午五時前，確切其今次提購是否進行，所以10月9日是首個關鍵日期。
由於併購存在不明朗，外界口碑一般，港交所股價昨日大插8.6元，跌3.5%，收報237.4元。由於併購短期唔會有結果，故此港交所股價短期易跌難升。不過，如果真係睇淡港交所併購成功機會，咁即係話搞完一輪最後變番原地踏步，咁對股價影響歸零，所以如果有興趣入貨，最好等股價插低啲時買入收息，等最後高攀敗陣而歸，天下回復太平，股價回復正常時就有胡食。
出口股繼續有得升
大市經過周三急升後，昨日跟美股高開124點，報27283點，續創8月1日以來新高，之後掉頭曾挫191點，回試二萬七支持。恒指收報27087點，跌71點；國指收報10592點，漲27點，成交金額768億元。平保(2318) 升1.5%，收報94.65元；南方能源(1573) 急挫38%，收報1.86元。出口股跑贏，創科實業(669) 收升4%，報57.3元，大和上調目標價至65元，評級為「買入」； 萬洲國際(288) 升3.9%，報7.22元，升幅居藍籌股第二位。香港寬頻(1310) 曾創上市新高，高見15.16元，收報14.94元，仍升1.1%；據聯交所資料顯示，資本集團(The Capital Group Companies)於周一(9月9日)，以每股平均價14.4737元，增持359.55萬股香港寬頻，持股量由6.8%增至7.1%。
此外，鴻海董事長郭台銘宣佈退出國民黨，有分析認為，郭台銘將會參選台灣總統大選。富智康(2038) 止跌回升，昨日低見1.01元，跌1.9%，但其後拗腰回升至1.3元，創一個月高位，收報1.18元，升14.6%；同屬鴻海系的鴻騰(6088) 股價則先升後回。
陸羽仁
金融High Tea - 陸羽仁 舊文
來源 source: http://hdfin.stheadline.com