廣告經綸 - 文迪晞 2019年10月5日
【廣告經綸】逆流而上之好時機 - 文廸晞
時局變得越來越敏感，公關公司突然之間有更多工作，收入不跌反升。 資料圖片 適中字型 較大字型
好多朋友及行家出嚟食飯，都問同一個問題：「OK嘛？最近生意有冇好差？」頭一個答案梗係「唔OK啦」。第二個問題，如果只可以答「有」或者「冇」，咁100%都會答「有」啦。但係如果可以再補充分析，答案可能係有啲有、有啲冇、有啲即時見效、有啲時辰未到、有多或有少、有快亦有慢，不能直接簡單的回答了事。
大型廣告及推廣活動，受影響一定最大、最即時；皆因做咗冇人睇，睇完冇人買，所以，這兩三個月，有許多廣告宣傳活動都延期或取消。今時今日，很多個人及機構都不知如何自處，獨善其身難，待人處世更難，只求好橋，順利過渡。於是，公關公司正正因為時局變得越來越敏感，突然之間有更多工作，收入不跌反升。只需放眼今天香港現況，立時便能知曉何以公關公司會變得吃香。
君不見幾多個人和品牌都因為講錯或講多咗嘢就出曬事？到底割定唔割？如最近美心、國泰（293）、大班、張敬軒等數之不盡。最差的情況，不是順得哥情失嫂意，而是兩邊不是人，黃藍皆不討好，換來「雙失」的結果。如今他們最需要的是一盞明燈，幫助走出困局。至於政府及警方，繼續唔應該嗰句偏講嗰句，應該講卻偏唔講，差不多日日都出事，但求好橋卻無人問津。就好似上次話說政府出了公關標書，八間應邀參加的國際公關公司全部拒絕。聽行家講，近兩日政府又再接再厲兼唔信邪，再出標書，即管睇嚇於重賞之下到底能否找到一個勇夫。另一邊廂，亦有尋路人「百萬求一路」，我哋即管放長雙眼，睇嚇有錢能否使得鬼推磨，最終有甚麼好橋可以幫香港力挽狂瀾。
所以話，處於亂世，有太多個人及品牌想要靠能幹的公關智囊去補位和捍衛，只要有橋、有頭腦又敢作敢為的，必有機會有所作為，逆流而上。
文迪晞
mailto:heyadmen@gmail.com
heyadmen@gmail.com
廣告經綸 - 文迪晞 舊文
來源 source: http://hk.entertainment.appledaily.com