恒生綜合指數季檢在上周五公佈，換言之港股通新標的候選名單已經出爐，現在只等滬深兩間交易所在3月6日確認，仲未知有咩新貴入選，可到青冰的專頁睇返舊文。每
年有咁多港股通新貴，但其實北水並不會每隻都愛，這次就談談如何去揀。
青冰慣常用的篩選法，先將行業分類，首先踢走內房及金融類股份，因為最優質的內房及金融，全部上曬市，有咁多選擇，新貴好難突圍；其次就是已經炒到爆的行業，今次有兩隻物管股，本身已經新高再新高，北水來到都係接火棒而已；第三就是避開市值幾百億甚至千億的股，唔係話睇死北水掃唔起，但這些股要用咁多錢先推得鬱，冇必要咁早入場吖，你睇小米（1810）及百威（1876），前者北水買了一個月先識行，後者北水直頭唔吼。
七除八扣後，餘下中手遊（302）、首長國際（697）、美東汽車（1268）、鷹普精密（1286）、愛康醫療（1789）、維亞生物（1873）及心動（2400）。愛康及美東都係強爆的股，現水平值博率低；維亞生物沒有藥又不是生化股，更似一隻創投，都係skip喇；剩返落嚟嘅，中手遊就最似樣。
早兩日新聞話「王者榮耀」一月吸金90億，二月肯定過百啦，肺炎病毒令大家困喺屋企冇得出街，打機課金變成最佳消費。中手遊係內地IP遊戲最大發行商，IP遊戲者，即係用著名小說、動漫及電影等題材做遊戲，「真三國無雙」及「海賊王」，相信戰友冇打過都聽過吧，所以話中手遊在國內知名度甚高，並不誇張。同是去年第四季上市，心動已比招股價倍升，中手遊只係漲兩成幾，屬非常落後。
身為國內熟悉的品牌，業務受惠肺炎疫情，上市後升得唔多，相信這三大因素，足夠吸引北水3月9日來掃貨吧。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.entertainment.appledaily.com