向不同業界傾斜嘅新增撥款，粗略檧計，金額合共905億，絕對多過回水嘅數目。資料圖片
「兩萬？你有冇咁大咬呀？」回水一萬，建制口水都流埋，成功爭取嘛，助攻嘛，清楚，明白。
噚日公佈預算案，我將政府向不同業界傾斜嘅新增撥款，粗略檧計過，加埋自去年嘅幾輪所謂紓困措施，以及新成立嘅抗疫基金，金額合共905億。要留意，以上計算不包括減收嘅各種費用；我針對嘅係對個別業界少數既得利益嘅輸送。
905億呀！其實，大家有所不知係，派畀少數既得利益者嘅錢，絕對多過回水嘅數目。
唔服？舉個例，政府成日講創科，又話要產業多元化，理由好似好充分；問題係，咁多年來，有冇睇過成效？又好似我最憎嘅科技券，派咗幾年，大家心照，養肥一班尋租者之餘，真係提高咗香港中小企嘅營運效益咩？最緊要係，究竟提升企業營運效率嘅責任，係邊個嘅？我都係一間微企小老闆，我會話假如東主連呢個責任都要政府支助，不如唔好做生意啦。
知唔知點解香港嘅市場咁多人屍位素餐？點解咁多老海鮮仲用緊八十年代嘅心態經營廿一世紀嘅生意？梗係啦，都冇推陳出新！你做生意做唔掂呀？唔緊要，政府打救。你唔識用IT ？我哋有一班專才，幫埋你申請政府資助！一站式服務，係咪好體貼？咁，嚟緊立法會選舉，識做啦，獻世派幫你哋成功爭取㗎，你哋咪投佢哋一票囉。你裝咗套軟體唔識用？啲員工唔肯用？關人囉。
敗家產。當一個地方，一個行業，衰到連老闆都要政府去補貼，真係道德淪亡。喂，你失敗，你唔與時並進，你死，你事。唔通當你靠自己撈得風生水起，政府又可以同你講：「喂，記唔記得2020年，我幫過你？」你真正要記得嘅係：「一個大到可以乜都畀你嘅政府，亦都可以隨時剝奪你擁有嘅一切。」
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://hk.entertainment.appledaily.com