最關心股市的特朗普，在上台以來對股市最關鍵的一次講話中，竟然交白卷，齋鬧人但零救市措施，全球再一次大冧市，反映佢陷入錯判形勢、低估疫情、
束手無策的困局。假如今年連任失敗，可說咎由自取。
港股裂口再冧近千點，周三在網台節目的「中途島」技術分析，不幸言中。「咁幾時先見底？幾時撈貨？幾錢撈？」呢幾日超多人問。技術指標上，中大價股普遍已經隊穿保力加底部，一般跌穿兩三日就會有反彈（最差情況係急跌轉橫行），咁點解唔食花生睇住先，而非要家陣伸手去接飛刀？唔少人將買股票當成「無比膏」，主要用來止痕。其實咁樣問題都唔大，你雞仔注買一手，贏咗執餐茶，輸咗咪當跌咗盒口罩，用呢種心態去撈底，未嘗不可。
圖表去睇，恒指支持位在24200、22800，但呢種市況係消息主導，關鍵仍是疫情，歐美短期似乎仍會惡化，各國會陸續封城，股市有反彈無升幅；沙地、俄國仍在講數，油價短期都係低位「發上發落」；利率期貨預期，下周美聯儲9成機會減息1厘，即係所有子彈一炮過用曬，之後就等印錢買債，全世界零息咁滯，金價中線繼續睇好；值得留意，近日股市狂插，但美國債息卻低位急彈，債市聰明錢回流股市？抑或債息唞唞再跌？拭目以待。
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://hk.entertainment.appledaily.com