「爸爸，學校月底有個Ball，可唔可以買對新鞋寄畀我啊？」當武漢肺炎在英國爆發，正在中學寄讀的女兒，傳來一個咁嘅訊息，令我O嘴之餘，亦都助我
迅速決定，就算英國政府未宣佈停課，都要先接細路返屋企再講。
兩個細路分別讀中小學，我自己也在英國「伴讀」，目睹當地人防疫意識薄弱，腦筋亦十分頑固。例如三大報之一《衛報》，這兩日竟仍發表戴口罩「不能保證無事」、若只係街上行走，或者乘公交出行，根本唔使戴口罩等謬論。另有電視台街訪長者，冇口罩不在話下，佢哋鏡頭前還以「Social Animal」自居，表示就算明知有風險，總之唔出街就對唔住自己。
過去幾日，英國政府的「佛系抗疫」：不檢測、輕症不治療、不停課方針，引起了很大爭議。當武漢肺炎正在高速擴散，英國得少數人戴口罩，學校尚未停課、老師學生基本上不戴口罩，病毒一旦入侵校園，有非常高機率經學生帶回家傳播，感染其他屋企人。怪不得約翰遜（Boris Johnson）誠實地話「要有失去摯愛的準備」。
當亞洲各地早已示範，做足預防措施，就能減慢病毒擴散的速度，何解「日不落帝國」偏偏犯下低層次錯誤？對於停課安排，Johnson口中所謂「more harm than good」，究竟又係咩意思？
一來英國人知道，本來平均的醫療設備，例如氧氣、呼吸機等治療肺炎的重要器材，人均數量相比起意大利和德國，實際上都還要更少。二來一旦停課，部份醫護人員因為照顧孩子，很有可能就要放下工作回家，間接導致英國的整體公營醫療系統加速崩盤。
既然停又死，唔停又死，Johnson好似入賭場買大細，一度押注唔停課，然後被鏟到上天花板，最近改口風，呼籲人民減少不必要社交接觸，奈何仍不宣佈停課，力度遠遠未夠。
尹思哲
http://linkedin.com/in/wanszezit
創業起義 - 尹思哲 舊文
來源 source: http://hk.entertainment.appledaily.com