有流動性危機同冇流動性危機之下嘅跌市，係兩種好唔同嘅市況，有流動性危機，沽貨只為保命而非講平貴，當流動性危機真正完結，股票
通常會快速修正返原有價值，至少由恐慌價變返衰退價，擺脫衰退就變返正常價。
過往幾十年嘅流動性危機都係短暫，今次會唔會唔同？睇嚇聯儲局會唔會尋求國會批准印銀紙買股票，呢個係阻止流動性危機惡化嘅有效方法。聯儲局拿拿聲減息1厘，令市場覺得冇招可出而大跌，但聯儲局向來唔係低手，有後著機會更大，至少聯儲局試過舊招冇用，先能逼出新招。
印銀紙係咪毒藥？如果仲係相信過往十年美股係靠印銀紙去支撐呢隻長牛，就要睇嚇究竟呢十年牛市係由乜嘢股票帶領，Apple、Google、Amazon、Microsoft，科技令產品同服務成本下降、質素提升，壓抑通脹，轉而容許低息環境持續，其實係當中更大原因。08年金融海嘯後聯儲局推QE，其實初時銀行唔太積極向實體經濟注入資金，若幹年後嘅M2升幅亦唔算離譜。他朝經濟係咪進入衰退、滯脹？除咗貨幣政策之外，仍要睇科技能否繼續轉化為經濟成果。如果從恐慌價去博呢件事，唔應該太悲觀，當然首要係持倉能力。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com