【異動空間】悶市吼潛力板塊 - 魏力
中教聯席主席謝可滔。資料圖片
市況陰陽怪氣，恒指在10天線（24123點）至20天線（23799點）之間飄上飄落。歐美疫情開始緩和，油價暴冧後亦見喘穩，市場波幅收窄，加上首季業績期將至，大戶買齊貨等揭盅。呢種場面，應對方法不外乎兩個：一、縮到好細注
買強勢股，拉遠少少止蝕等佢上；二、食花生。
提提戰友，下周二（28日）為期結，當日北水會暫停，之前無北水首日，好多時都係挾升。當然往績只供參考，但當日預咗大波動，多貨一係做對沖，一係就索性減貨。
板塊方面，資金仍在圍爐炒作醫療、物管股，始終與疫情無大關係，業績最放心。加上3月股災基金「倒瀉籮蟹」過後，需要重整投資組合，套現的資金自然優先泊落上述呢兩類股，變成「升到你唔信」。
另一個潛力板塊係教育股，中教（839）公佈截至2月底中期業績，核心純利按年大增32%，毛利率增2個百分點，派息大升2.8倍，加上其收購能力出眾，對業績有支持。公司更強調，不會因疫情退還本學年年費，而雖然學生住宿費等收入會有所減少，但佔總收入不足1成，相信對業績影響不大，股價上日低位漲近1成，整固過後應仍有上升空間。
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://s.nextmedia.com