【智取大市】信用危機危過油災 - 晉佳
美股現價似乎係賭緊美國唔會出現企業信用危機。資料圖片
油價大跌變咗真正黑天鵝，暫時未震散股市，中東國家潛在危機會否爆發，都要等低油價持續多兩三個月先見到實際影響。不過，油產量年年上升速度跑輸各國GDP增長之餘，價格亦反覆下滑，市場規模同影響力越嚟
越細，尤其近期各國貨幣基礎急升，會淡化油價對金融市場衝擊。
油價最多只係其中一個危機，未來更大潛在炸彈係企業信用危機。疫情過後，邊啲企業仲有生意？邊啲冇收埋炸燀隨時爆煲？應該向邊個借貸？以乜嘢息率放貸？未來全部變成問號。信用危機直接影響銀行向各行各業輸血，如果輸血少做少錯當然能避免壞賬加劇，但又會引發經濟危機，形成兩難局面。聯儲局減咗嘅1.5厘息差，遠遠唔能夠應付信用問題。生產鏈方面，供應商同客戶之間互信程度亦成疑問。
環球量寬同埋救市措施，暫時填補經濟停頓引致嘅資金鏈斷裂問題，疫情過後真正復工，信用危機先會真正出現。美股現價似乎係賭緊美國唔會出現企業信用危機，亦包括一啲強勢企業喺過程中完全唔會出現問題，當然未計及信用危機影響整體經濟而產生嘅衝擊波。估計未來幾個月，股市會出現超大兩極化形勢，強弱更為分明，睇怕近排只係開始。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com