估唔到滙控（005）停派息單嘢，可以講到成個星期都仲講緊。
收息股，當然係買入後期望佢年年有
穩定收入同派息。銀行，本來就唔係盈利同派息穩定嘅行業，好似100年前嘅錢莊，淨係收存款同放數，同樣要經起經濟周期起落，以及債仔還唔到錢嘅風險。況且今時今日銀行有強大嘅高波幅財富管理業務，就算係借貸畀高槓桿嘅對沖基金亦係高風險。話恒生（011）能夠做得到收入派息穩定，只因為財資業務出色、作風穩健，係罕有嘅例子，絕對唔能夠放諸銀行同業身上。
銀行股之所以用市賬率去計算估值，正正係因為佢盈利不穩定嘅本質。去到今時今日，投資資訊發達嘅年代，竟然當一隻質素不優良嘅銀行股係高息股，只能怪自己而已。
本欄喺年幾前都曾經喺中銀航空（2588）60蚊左右推介過，覺得作為半收息、半增長嘅股份，進可攻退可守，雖然大半年內升到80蚊，當時又點會估到一個武漢肺炎可以將全球航空業冰封？故事告訴大家，即使買中電（002），都要review業務前景，試想像有一日，新能源能夠逐漸取代傳統能源，咁中電仲有冇能耐保持高息股地位？
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com