湯文亮博士兩年前《三年後才買樓》一文，講到一對夫婦因為信博士話滙控（005）會升到150蚊，所以將1,200萬買曬滙控。博士就話
，夫婦係虛構嘅；兩年後嘅今日，作為後輩嘅我，不如試下幫博士寫埋個結局：
親愛的湯博士：
你最近還好嗎？尚愛吃水果嗎？我就是三年前向你發短訊的那對夫婦的老公。想當日，約在2018年3月，我們因為看到湯博士的鴻文，預言滙控三年後會見150元。然後，我們想了想，就把心一橫，將原先預留作買樓的1,200萬元，一炮過，買滙控！豈料，三年未到，驀然回首，買滙控，原來一場空，而我們的心，也穿了個窿。如果你問我，那個窿的面積有多大？我會說：咪就係我輸咗嗰四成股價咁大！！！！
不好意思，今次來信，我不是想遷怒於你，我是想懺悔，我知錯了……我錯在太迷信，迷信「買滙控，穩陣啦」。現在蝕價又蝕息，我迷信，我輸錢，是我抵死！湯博士，我再一次強調，我絕對不是在怪責你，但我要對你坦白，早兩日我的心情是這樣的：「你有冇搞錯呀！我信錯你滙控會上到150蚊，都係我蠢我低能；但最令我傷心嘅係，你竟然同我講你一年前聽老婆話沽滙控！枉我喺呢兩年入面，每次對住滙控股價，都講一句「信博士唔驚！唔賣！」你點對得住信徒如我呀！！
不過，現在我釋懷了，至少，你沒有像那個所謂的Ken Sir一樣，教我借孖展炒滙控；教我「loop loop loop大法」，令我原本一個「燶」變「燶燶燶」。今天的我，只炒燶，沒有Loan。對比其他人，我的狀況，已經算很好了；而你，對比起其他神棍，也算是一個好人。最後，我想提一提博士，如果專欄再提起我，不要提我老婆了，因為佢嬲我信博士，買滙控，已經離開我了。最最後，我今次也送上果籃，希望你喜歡。
兩年前信你買滙控現在窮到燶的人上
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.entertainment.appledaily.com