若說3月是股災月，那4月肯定是油災月了，當大家以為上月油價跌一半好大鑊，但周一晚上5月期油歷史性以負37.45美元收市，顛覆了我們在書本上學習的理論。還記得讀書時代，教授話在期貨市場，沽家是贏有限輸無限，因為價格可以不斷升，相反買家輸極都係你付出的價格，因為最低係零嘛。
散戶狂撈油股ETF，期油轉倉成本導致損失，這幾天已經有唔少欄友解釋過，但相信大家都想不到，轉倉及交收的因素，促使期油價見負數。不過原來上月19日瑞穗證券Paul Sankey已警告，國際油價會一直跌至負數，因為武肺令全球對石油需求劇減，油企要搵地方儲油，油庫最終會飽和，令庫存成本急升，屆時油企寧貼錢畀大家買油，造成負油價。想當日期油一度高見27美元，相信當時大部份市場人士，都會覺得佢飲大咗，語無倫次，結果就是「我笑他人看不穿」。
相信這個幾月，因油價急瀉而入場博反彈的，有99%人應該沒想過油儲的問題，當期油係期指咁炒。全球最大的儲油庫係在俄州的庫欣（Cushing），根據資料，佢哋上限容量係7,600萬桶，截至4月10日的數據，已經有5,496萬桶，逢周三便會更新資料，本文見報之日就知最新數字，可能屆時已經爆倉了。5月期油要實貨交收，一張合約1,000桶啊，冇地方擺又要交收，自然係平倉離場啦，但市場上哪有大量買盤承接呢，所以一切就如Paul Sankey所言，負油價。
最新發展係期油ETF會將6月期油轉至9月份，而美國那隻USO亦轉至8月份，結果係點？就係一齊再沽6月去轉倉，進一步踩低6月期油，形成一個死亡漩渦。你話一個尋常散戶，如何懂去理解以上事件？先求知再投資可能是事後孔明，但急插勿接飛刀，實在是散戶保命大智慧。
青冰
http://www.fb.com/chingbing888
-----------------------------
App內1-Click訂閱《蘋果動新聞》
按此了解更多
-----------------------------
屬於香港人的移民攻略
立即登入【全球樓行】
Dream House零距離
來源 source: http://hk.appledaily.com