【笑到最後】畢菲特嘅煩惱 - 高明
巴郡截至三月底現金高達1,370億美元，同時資產及現金流亦龐大，至於機會會否跌出嚟，出現揮捧區，可能畢菲特都係聽天由命。 資料圖片
一年一度的巴郡股東會，股災前後，畢菲特賣航空股及之後點出手係市場指標，不過，答案其實有少少失望。
關於盡沽四大美國航空股
，畢菲特直接話睇錯市。至於今次會唔會好似金融海嘯咁，巴郡出手救市，佢就話聯儲局借錢畀出事企業速度太快，巴郡嘅現金都冇乜機會出手，而且𠵱家冇乜吸引嘅投資。
實體經濟不振，但同時零息出現，正如本欄多次強調，未來回報會壓縮得更緊要，咁點樣做？最近一單交易，值得參考。
平保（2318）旗下平安人壽向新地（016）及郭氏家族公司購入西九高鐵站上蓋地王項目辦公室部份合共三成權益，而零售部份將繼續由新地全資持有。首先講平保，通告指出，平安人壽買嚟做香港總部大樓。簡單啲講，就係自住樓唔怕買嘅邏輯，零利率政策影響資產價格，過去十年試過一次，未來十年會唔會因為咁而再大升特升？唔知，透過自用物業邊用邊博，比較合理。
新地出售辦公室權益，保留現金。現金同時既係王又係寇嘅年代：只得現金會被零利率挾死；冇現金遇危機即死。即使係地王，都冇得自己賺曬，亦要留現金守門口。
更加重要係，新地零售部份全數保留。香港經歷本地五一黃金周長假期，本地武漢肺炎疫情有好轉跡象，香港人已重回街頭飲飲食食，即使冇自由行都人頭湧湧，以港人消費習慣，以零售租金為現金流，長線穩陣。
聯儲局打救，資產價格及回報變得中庸，失去暴跌而產生嘅機會，連投資組合亦要中庸，資產、現金、收入，缺一不可。事實上，巴郡都係類似結構，截至三月底現金高達1,370億美元（1.06萬億港元），同時資產及現金流亦龐大，至於機會會否跌出嚟，出現揮棒區（sweet spot），可能畢菲特都係聽天由命。
筆者為證監持牌人，持有巴郡。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://s.nextmedia.com