【笑到最後】點解要賺埋最後一蚊 - 高明
移民已成為港人熱議話題，對於港人嚟講，最大心魔係要喺香港賺埋最後一蚊
，之後先買機票走人。 資料圖片
上個星期三，高明約咗尹思哲做直播，講佢一家移居英國經驗，講到大部份人對前途問題，主要考慮就係份工。對於香港人嚟講，最大心魔係要喺香港賺埋最後一蚊，之後先買機票走人。
一個人究竟有冇意欲改變生活環境，只要一聽到佢答「賺埋最後一蚊先走」，已經知道佢冇興趣改變，莫講話移民咁大陣仗，連轉工都九成唔會，情況有如打工有同事返工受氣後講嘅悔氣說話：我賺夠N咁多錢就會劈炮。結果最準時返工、做得最耐就係嗰位同事。
先講收入來源，港人三大收入來源：工作、買樓、股票。三樣之中最無需要喺香港嘅就係股票，事實上，過去幾年，港股係逼你慢慢減少投資，2017年雖然集中炒龍頭幾隻，但都間中都有中下價股可炒，近兩年已全面歸邊，最新一浪除中概股及新股外，選擇比三年前慢牛更窄，逐步向外發展係形勢迫出嚟。如果收入夠多元化，唔局限於香港，冇所謂「賺埋最後一蚊」。如果要賺盡先走到，即係所有投資同技能，都集中喺香港，甚至集中喺份工度，一脫離就失去謀生能力。
高明可以肯定，你永遠都唔會賺得夠——即使你定咗個絕對值，例如一千幾百萬——當真係到價嘅時候，你都會覺得唔夠，然後再安慰自己話再賺多兩年錢。因為只要你嘅收入係月薪計算，你就會陷入一個捱時間就有錢收嘅景況。另一個危險嘅陷阱，就係固定月入上升嘅過程，正比例提高生活水平同開支，結果無論月入一萬定一百萬，到糧尾時都係歸零，呢個亦都會同任何轉變絕緣。所以話英國人好壞，今次BNO移居條款，可以話係抵壘政策2.0，要嘅唔一定係最高收入或最有錢嘅人，而係好似當年港英抵壘政策，要嘅係心中有團火嘅人。如果當日佢哋賺埋最後一蚊先嚟，香港未必可以成功到有老屎忽大談收成期。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://s.nextmedia.com