【笑到最後】科技指數＝當炒指數 - 高明
Tesla創辦人Elon Musk細個鍾意玩電腦，經常俾老竇取笑，結果Elon Musk創辦完一間又一間企業出嚟。 資料圖片
恒生科技指數今日推出，公佈名單嗰時已被人話，成個指數冇一隻香港股。
有冇香港係一個話題。但係更重要，係有冇科技？乜嘢係
科技，本身已經好浮動，一百年前整電燈膽係科技，相對蠟燭；又或者相對馬車，電油車係高科技。
Tesla創辦人Elon Musk細個鍾意玩電腦，12歲已經寫遊戲，佢老竇係工程師，經常取笑個仔，話真正嘅「工程」冇可能由嗰部玩具做得出嚟。結果Elon Musk創辦完一間又一間企業出嚟。科技，就係一出嘅時候人人都質疑。
美國係度爭拗緊網上租電影、分享BB相算唔算科技時，香港真正科技界都拗緊咩係科技，因為有傳Daydaycook創辦人參選IT界功能組別，由拍攝到放上Youtube同整App，盤生意可以完全唔接觸科技，專心煮餸，做個廿一世紀方太。
再睇嗰份名單，放諸今日，整遊戲、送外賣、網購，算唔算好高科技呢？相反，驅動上述生態圈嘅電訊商冇份。網購今日你同我都做到，但電訊商畀個牌我都未必做到，咁究竟邊個高科技啲？說穿了就係因為唔當炒。
本來整個創業板係「第一代港版納斯達克」，但港交所（388）壟斷上市權，令到上市地位值錢，放鬆畀人尋租，收緊又令創業板變得冇價值，唔繞過港交所另立一套上市制度，香港根本冇可能有接近科技板嘅嘢。但上市權等同香港政府印鈔機，現有政府肯定唔會放權。
第二代港版納指，成功機會大過第一代，因為邊隻當炒放邊隻入去，證明恒指公司啲人仲清醒，知道炒賣先係香港強項，如何令港版納指更偉大？就係正名為「當炒指數」，並且由30隻減到4隻，ATMX就算，其實個市都係睇最當炒幾隻，取代埋恒指都仲得。
高明
http://fb.com/bigricetea
笑到最後 - 高明 舊文
來源 source: http://s.nextmedia.com