【大茶飯】科技戰升級 免置身其中（青冰）
【大茶飯】科技戰升級 免置身其中（青冰）
中美科技戰升級，美國封殺Tiktok，限制在45日內達成協議，否則就封舖。更多
中美科技戰升級，美國封殺Tiktok，限制在45日內達成協議，否則就封舖，本來香港股民只係吃花生，因為Tiktok母公司字節
跳動又冇上市，影響有限，不過上周五侵侵的行政命令，係包括埋騰訊（700）旗下的微信，這消息就拖累騰訊股價在周五曾急瀉一成，500蚊都穿過，簽個名就打低股王，相信侵侵一定好滿意。
隨後有不同傳媒就分析，指只係限制企業同微信進行交易，不影響騰訊在美的遊戲業務，又有人話即使鬱埋遊戲業務，只會影響騰訊遊戲收入的1%，不過亦有外電說，騰訊在美的投資亦將受影響，並列出有關投資，Riot Games、Activision Blizzard、Snap、華納音樂及Tesla，至於騰訊是否仍持有Tesla，青冰昨天在專頁都有分折過，有興趣的戰友可以跟返。
市場最怕不確定性
究竟個影響係大定細，眾說紛紜，但由於現時的資料較含糊，真係冇人講得清楚，投資市場最怕的不是大影響，而是不確定性，你睇肺炎對全球經濟影響咁大，大部分公司啲股價都沒有比3月低，因為過了半年，市場都約略估計得到影響有幾大，股價已經反映得七七八八，跌得最甘之時，就是大家估估下，亦即係3、4月之時。
這個不確定性，將會拖多一個月，直至有更多細節披露，青冰看過一個分析，鬱股王就是想鋤Tiktok個價，如果此app真是垃圾沒威脅，相信微軟及Twitter都不會爭住買，之但係，作為廿幾年的微軟忠實用戶（其實都冇得揀），微軟的業務從來同「潮嘢」拉唔上關係，萬一畀佢買到，肯定是美國其他短視頻平台之福。
有戰友手持蘋果，話擔心中國會出手反制，例如向蘋果報復，而地上最強的蘋果分析員郭明錤，指如果在全球App Store移除微信，預計每年的iphone出貨量將下降25至30%，如果只在美移除，只會影響3%至6%，他亦建議投資者減持蘋果概念股，以應對風險。郭明錤開到聲，絕對應該尊重，但只要你細心睇，其實蘋果產業鏈，有唔少都是在國內生產，瑞聲（2018）、高偉電子（1415）、比亞迪電子（285）、甚至是A股的兩隻長牛股立訊精密及歌爾，如果要反制蘋果，相關工廠都要面對極大問題，都算係七傷拳呀，概率高不高，戰友可自行衡量。
兩陣交鋒，實在有太多嘈音，真亦假時假亦真，如果自問沒信心駕馭得到，減持相關股份避險，都係正常操作，大家近年都經歷過貿易戰及肺炎市，只要不置身於風眼中，仍有不少股可玩。
青冰
http://www.fb.com/chingbing888
本欄逢周二刊出
大茶飯 - 青冰 舊文
來源 source: http://hk.finance.yahoo.com