【笑到最後】「如果我突然間一無所有」（高明）
高明指，由禁用名單思考，邊種產品你冇得用會好煩，制作出一個選股名單，買嗰啲股，未來十年表現一定好過你跟潮流追乜W股、B股。
「如果我突然間一無所有，冇得用iOS、Andriod、Gmail，我可以點算呢？」
過去十幾年，包括高明在內，好多香港
股民都喺港股度浮浮沉沉，唔少人都宣稱佢哋「贏大鑊」，觀察所得，即使真係「贏大鑊」，只要你留喺港股市場，都會喺第二度輸返，情況同去澳門賭錢接近。第一個原因當然係港股土壤問題，第二個原因，就係揀股嘅方法出錯。
港股係一輪輪潮流，金融機構同傳媒合唱，由四萬億方案資源股、到之後二三線股、殼股、賭股、AH股、2015年港股通、2017年騰訊（700）+平保（2318）同一堆新經濟新股、到今年W股同B股。搞一大輪其實冇幾多隻股持續升咗咁多年。同樣準則，去美國命中準高好多，至少由你日常生活用到嘅美國公司去買，過去十年回報肯定好過留港四圍撲。
歸根究柢，因為香港太容易接觸全球產品，任用時就好似空氣，根本唔會珍惜。簡單如一個Gmail，當年打破咗電郵只得10M空間嘅概念，到依家靠呢個電郵賬戶，接通咗幾多其他產品嘅戶口。日日用根本冇感覺，所以冇太大動力，將呢種對產品嘅依賴性轉化為買佢嘅股票嘅行動。
反而留喺港股市場左撲右撲，而冇諗嗰啲股嘅產品有乜咁偉大。如果有一日你冇得用啲咩資源股、AH股、殼股、新經濟新股、B股嘅產品，對你生活影響可能冇乜。冇得用騰訊嘅Wechat，可能真係影響好大，亦都解釋返佢股價嘅強大。
如果冇得用iOS、Gmail、Windows、Whatsapp，可以點算？唔單止生活會倒退廿年，部份生財工具亦無法接觸。呢個就係偉大企業嗰種壟斷，同港股嗰堆尋租壟斷股唔同，偉大企業靠自己產品優越同創新令你一路畀錢。股票市場有時會reward尋租股，但再拉長就只會reward偉大企業。
中美角力，喺美國已經冇得用抖音、Wechat，倒返轉香港將來冇得用Gmail、Whatsapp，已經係有可能發生嘅事。由禁用名單思考，邊種產品你冇得用會好煩，制作出一個選股名單，買嗰啲股，未來十年表現一定好過你跟潮流追乜W股、B股。
高明
https://www.facebook.com/bigricetea/
-----------------------------
【全球樓行】 Dream House零距離
屬於香港人的移民攻略
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：
iOS / Android
笑到最後 - 高明 舊文
來源 source: http://hk.news.appledaily.com