【智取大市】舊經濟復蘇股抬頭（晉佳）
晉佳指，若然憧憬疫後復蘇，航空股復蘇進度必然較遜色，貨櫃航運股會較秤先。
港股周五一度因為美國制裁微信而急跌。美股方面，非FANGMAN嘅軟件股出現小股災，可以話有三分之一個美股熱炒陣營大震盪。資金同時流入舊經濟板塊。美股裏面，銀行股、航空股都沿5天
線慢慢升，嚟緊一周資金流入呢批舊經濟落後股，有機會升幅擴大，而科技股預計會持續振盪。
嚟緊一星期，相信港股總有風險胃納回升嘅時段，有復蘇潛力嘅低殘舊經濟股，以及細價股，有機會炒上。舊經濟港股選擇同美股有啲唔同，由於美股當中，個別低殘股淡倉比例超高，例如AAL、CCL、RCL，只要舊經濟股反彈，呢類股基本上都跟彈。港股缺乏呢種情況，揀股要從基本因素出發。
航空股賺錢嗰部份係客運而非貨運，若然憧憬疫後復蘇，航空股嘅復蘇進度必然較遜色，貨櫃航運股會較秤先。中遠海控（1919）本身有貨櫃運輸、碼頭業務，近年收購東方海外75%權益，已形成霸主佈局，負債高形成槓桿偏高，行業反彈時非壞事。以中遠海控龍頭地位，定位應該最食得應疫後復蘇，近期股價表現亦係行業之中最佳，但長遠當然要留意佢係貿易戰受累股。
舊年運2,574萬隻貨櫃，佔全球15%，每年吞吐量達1.24億箱，以H股股價計，市值得400億，作為運輸行業必要環節嘅霸主，市值不足阿里嘅1%，長遠遲早會修正。短線中遠海控呈升勢，5天線現支持，呢個星期炒舊經濟股應有佢份。
晉佳
-----------------------------
【全球樓行】 Dream House零距離
屬於香港人的移民攻略
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：
iOS / Android
智取大市 - 晉佳 舊文
來源 source: http://hk.news.appledaily.com