士佳說 - 張士佳 2021年10月5日
【#士佳說 】張士佳：冇乜冧把
【#士佳說 】張士佳：冇乜冧把
昨日又係國內長假期間跌五六百點，記得上個月，中秋節假期間開市亦是如此套路，上次係因爲內房債的原因。今次主要係恒大及重提中美貿易協議，話會對中國的貿易展開調查，又話怕加新關稅，尋晚美國表明無意加劇緊張關係，又冇提加關稅，不過大國博弈，誰曉得，反正兩地股市還是先跌爲敬。
這幾年全球受盡新冠疫情擾亂，終於傳來默沙東MRK.US開發了口服抗新冠病毒試驗性藥丸，為可治療病毒的重大進展，佢講話可將死亡風險降低一半，消息一出，疫苗概念股大跌，我都有隻騰盛#2137中招，蝕12%過外走人，消息剛開始，估佢仲要跌多一排。不過，口服疫苗藥如能夠真的有效，會對疫情敏感的經濟產業如 能源，金融，航空旅遊，消費等板塊帶來刺激。
疫情緩解對社會帶來疫後新常態，有機會為第四季的主線。率先反應就係航空股國航#753、南方航空#1055、東航#670等；同時離不開燃油股中海油#883、中國石油化工#3983等，旅遊網站股攜程#9961都有得升，不過最靚都係喼神新秀麗#1910，一直都有留意提及，尋日昇到阻力位等回一回再上車。同時，國內主營主題樂園的海昌公園#2255大升20%；復星旅遊文化#1992都急升，國內旅遊升唔係好有道理，本身國內疫情都控制得唔錯，若有貨的偏向食糊，好消息出了，反而傾向賭股，尋日講過唔係澳門，咁柬埔寨可能唔錯，同理，如果疫情降溫，馬來西亞都同樣受惠。
至於恆大暫時最好既資產就係#6666，合生創展#754收購恒大物業約51%股份，獲恒大物業控股權，恆大停牌應該係正面的，昨日內房逆市升得不錯，物管股表現更硬淨，最靚都係華潤#1109 同碧桂園服務#6098，不過，有一隻細隻乜都做的#331豐盛生活服務都好有機會，等佢洋燭破頂就關注；現在大部份人都話恆大問題已拆到尾聲，我唔敢講，但係睇圖都知少少，尋日斗膽講隻長跌長有嘅恆大汽車#708，結果升三成，不過除咗技術之外買呢啲股，細膽啲嘅都唔敢。
本地地產與 reits，如新世界#17等，都似乎穩定。加上政府司政報告估計會加快土地和房屋供應，新中#16亦提出多項建議，包括容許發展商盡早參與新發展區的發展；考慮推出土地債券等，本地地產股應該會有一輪反彈，至少上反250天先算吧。
之前話聯想集團#992默默地升，昨日飆高1成，上交易所確認受理其發行CDR上市申請。好消息刺激，希望唔係只係炒一日，繼續關注。另外，講隻冇人睇嘅，喺國內賣開零食嘅#3799達利食品，上月出完業績，近排有啲升勢。旗下產品樂虎，係全國頭三最暢銷功性能飲品，樂虎上半年嘅營收有19億，同比增長15.1%。宜家近250MA，洋燭破近期頂咪睇多兩眼囉。
提一提尋日電力新能源板塊集體下跌得幾厲害，似乎好像一下子就不缺電。原來俄羅斯位於黑龍江省黑河市的中俄電力換流站同意對中國增加供電，全力運轉時數將由5小時提升至16小時。向外買電冬天舒緩決電情況，所以電力新能源亦要在高位調整一下，都非常合理，不過幫得一時幫唔到一世，新能源始終都要支持，跌完呢浸咪睇吓嗰啲風電囉。
唔好見我寫幾個冧把，以為個市幾好，其實好難搵到冧把出嚟，尤其是想睇中長線啲嘅，搵唔到幾多隻，即係個市認真麻麻，暫時小注怡情好了，唔好中「冧把降」。
士佳說 - 張士佳 舊文
本文作轉載及備份之用 來源 source: http://skycheung.weebly.com