操盤手劄記｜元宇宙概念股 小注湊熱鬧（割柑人）
操盤手劄記｜元宇宙概念股 小注湊熱鬧（割柑人）
呢期最熱炒嘅槪念，莫過於「元宇宙」（Metaverse）。
美國收水唔係吹水，但聯儲局強調加息時機未至，美股三大指數上周連日破頂，今年以嚟，道指已經52次創即市新高，43次創收市新高；標
指76次創即市新高，63次創收市新高；納指43次創即市同收市新高。以標指計，勢將打破1995年嘅77次紀錄，創新高次數都創新高！反觀中港股市，滬指失守3500關，恒指失守25000關，相對年頭，前者重返起步點，後者更比起步點倒退超過2,300點。中港股市上周弱過藥煲，原因之一係擔心內房債務爆煲。
美股、外匯、加密貨幣免費即時報價，自選投資組合獲取相關新聞提示。
全球最大資產市場係邊個市場？美國股市？錯！美國債市？都錯！答案係中國房地產市場！比起美股市值47萬億美元、美債市值48萬億美元，中國房地產以62萬億美元市值稱冠。中國房地產衍生嘅信貸市場，亦僅次於美國信貸市場，排名居亞。近期中國房企美元債券連環爆出債務違約，而內房賴債又焫埋內銀，火燒連環船。中國房地產係市場中最大嘅市場，風險不容小覷！
借助VR及AR並非新事
呢期最熱炒嘅槪念，莫過於「元宇宙」（Metaverse）。引爆熱潮嘅係近排醜聞纏身嘅社交媒體facebook（FB），公司喺10月28日宣布改名「Meta」，股票代號亦改為「MVRS」，以示押注元宇宙嘅決心。此前，美國17間新聞機構聯手調查由FB前產品經理Frances Haugen爆料嘅內部文件，喺10月22日起發布一系列名為「The Facebook Papers」嘅調查報道，披露FB為求利益罔顧用戶安全等眾多流弊。筆者唔信改名轉運，雖然FB股價由10月28日起計，7日累升9.3%。
元宇宙被視為下一代互聯網，究竟係乜？元宇宙一詞，源自1992年Neal Stephenson嘅科幻小説《Snow Crash》，以Metaverse描述一個平行於現實世界嘅虛擬現實網絡世界，人們置身其中可以化身各種存在。如果睇過1999年齣電影《Matrix》，可以想像為該電影嘅真實版。元宇宙係採用3D（三度空間）、VR（虛擬實境）、AR（擴增實境）、AI（人工智能）等技術支援嘅網絡世界，配備穿戴裝置如VR頭盔、AR眼鏡，加上3D全息投影，可以置身其中，在內工作、學習、購物、娛樂。講白啲，元宇宙仍然係互聯網，只係更具臨場感、更感官導向嘅互聯網。其實並非新事，尤其對game友嚟講。「元宇宙第一股」Roblox（RBLX），正係online game平台。
百度阿里等 申註商標
《紐約時報》上周五報道，facebook改名後頭砲，係計劃開設實體零售店賣VR、AR等嘅穿戴裝置。另外，《彭博》報道，Apple（AAPL）最快明年推出兼具VR同AR功能嘅頭盔。美國科技巨頭大舉進軍元宇宙，中國科技巨頭亦不遑多讓，字節跳動已喺8月底收購內地最大VR獨角獸PICO；百度（9888）、阿里巴巴（9988）、網易（9999）、愛奇藝（IQ）亦已申請註冊元宇宙商標。
元宇宙潛力有幾大？情況類似加密貨幣，相信同唔信兩派取態極端，難以理性方法評估。投資機會上，VR、AR、AI、NFT（非同質化代幣）、PUGC（專業用戶生產內容）遊戲平台、GPU（圖形處理器）、雲計算、高速無線通訊等相關股份都會受惠。投資策略上，宜以小注遠期期權方式押注，若果槪念成真，可贏大錢，若果槪念爆破，只輸小錢。唔知點揀，亦可考慮ETF，例如Roundhill Ball Metaverse ETF（META），比起孤注facebook值博。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com