笑到最後｜美股下半年三大展望（高明）
笑到最後｜美股下半年三大展望（高明）
上半年標普跌兩成，納指跌三成，待富股（高增長股）更加跌5成以上。
上半年美股並冇出現荷里活式嘅「美國佬會搞掂」結局，如果將整個走勢當作戲劇，就會變成大西洋彼岸嘅另一英語國家英國笑片戇豆先生，股價有如主角Mr Be
an一樣，當中浮誇打爛嘢，最正係個人本身笨拙，但又要懶醒，最後令件事更差，就好似美股經常發生反彈，然後第二日跌得更加多。
美股、外匯、加密貨幣免費即時報價，自選投資組合獲取相關新聞提示。
上半年標普跌兩成，納指跌三成，待富股（高增長股）更加跌5成以上，下半年究竟會發生咩事，喺唔同文章隱隱約約都寫過，但係一次過喺呢度整理。
1. 下半年股市升得幾勁
年頭大約一月尾至到二月美股失速，本欄已經多次強調，今次下跌唔係好似2021年咁，稍為跌一兩個月就會反彈，基本上上半年已經唔會再有升市，起碼要等下半年先出現。原因係跌幅來自利率，相對2020至2021年多次調整並冇利率轉變，任何利率上升，對資產價格都係真跌。
前半節暫時睇中，下半截則有待時間考驗，至於點解咁肯定下半年股市升得幾勁，其實都只係慣性嘅上落波幅，上半年跌得幾勁，肯定冇傷及「美股係霸權」呢個基本原則，反而，上半年嘅下跌加強美國整體霸權嘅實力，只要聯儲局一聲令下，本來最有威脅美元體制嘅加密貨幣，立即變成一堆源碼。
另外，加密貨幣金融風暴就係九七年泰銖嘅翻版，因為投資世界變得更加緊密，所以加密貨幣斬倉，對美股一樣有影響。市場對穩定幣有連環爆破嘅預期，就好似泰銖馬幣一路斬到港元一樣，現時睇呢個情況有機會稍為穩定，原因亦都一樣，就係太多人睇淡，吸引咗好多基金沽空，投機市場通常太多人押一邊，就會反其道而行。加密貨幣冇斬倉的話，對美股嘅沽壓隨即減低。
2. 聯儲局意外減慢加息速度
雖然本欄對於聯儲局嘅行為簡化為深層政府對經濟嘅操控，但係用呢個方法去分析又比起傳統經濟學婆婆媽媽嘅睇法嚟得直接。事實上聯儲局作為一個官僚體制，最大存在意義就係出糧，主事官員每朝瞓醒第一件事就係要諗點樣保住自己職位，其次就係諗點樣保住成個體制，第三先係諗維持價格穩定以及就業等等嘅其他人嘅事。
要做到第一件事，就要擦啱對鞋，鮑威爾喺呢方面嘅能力唔需要擔心；第二件事就係唔好搞「彎」個場，令民眾反你，繼而議員反你，一層推一層。聯儲局摧毀美元價值，直接拎加密貨幣興起，削弱咗美元生態圈嘅部份功能，呢個係其中一個搞「彎」個場嘅事例。
至於第三件事，正如好多做過幾年野嘅人會發現，正經事其實可以俾啲新入職同事做，做阿頭最緊要搞掂辦公室政治。
喺呢個環境之下，一路超低息即係聯儲局將個場交俾人，加息加得太急消滅經濟，又會引來眾怒。稍為減低加息壓力，有機會支持股價嘅中線升幅。
3. 油價回落
揸車入友唔覺，但係美國期油已經回落至100美元上落水平，牌面上嘅理由就係經濟衰退，預期油價下跌等等，更重要原因可能係俄羅斯入侵烏克蘭之後受到嘅制裁比想像中弱，資料顯示，侵略烏克蘭頭一百日，俄羅斯出口977億美元價值嘅石化能源，平均每日出售9.77億美元。雖然排名上中國取代德國成為最大進口國，但係整個歐盟佔俄羅斯侵略烏克蘭頭一百日石油出口嘅61%，制裁可能只係頭幾日有新聞唔買住，最後結果亦都回復正常。
當然，五月全球對俄羅斯進口按年下跌15%，最終都係減少左部份對俄羅斯嘅依賴，但係真正唔買俄羅斯油只得美國及瑞典，消耗一樣，有冇起返相應嘅核電廠（風能及太陽能遠遠追唔上石化能源嘅產能），其實最終都要買返轉頭。估計歐洲除咗唱烏克蘭版嘅今天我之外，下一步就係繼續買俄羅斯石化能源。供應穩定，價格有機會繼續回落，最多用經濟衰退口號去掩蓋實際上依靠俄羅斯石油供應質低嘅油價。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com