【平民投資教室】錢俊：2022最佳美國上市ETF
平民投資教室
日期：2022-12-13
更新時間：10:20:43
2022年投資市場可謂風高浪急。投資戶口唔見紅嘅人應該無幾多個。然而有危有機，喺美國上嘅ETF入面，年初至今最佳回報嘅五隻ETF（撇除槓桿ETF）升成超過50%，
第一位更升80%。
今年最佳板塊，非能源股莫屬。頭廿隻最佳回報ETF入面佔十七隻。一大主要原因當然係因為俄烏戰爭。多國對俄羅斯嘅制裁，俄羅斯以截斷供應歐洲天然氣作為報復，配合多地後疫情嘅經濟活動增加，對能源需求有增無減，導致能源價格居高不下。
當中升得最多係Vanguard Energy ETF（US:VDE）、Fidelity MSCI Energy Index ETF（US:FENY）及Energy Select Sector SPDR Fund（US:XLE）。三隻都係升57%左右，進佔最佳ETF第五至三位。
中期而言，歐美無論政客定係公民都難以對俄羅斯嘅侵略行徑妥協，因此雙方關係都難有大幅改善空間。加上能源價格高企對產油國有利，而且沙地及伊朗等亦與美國關係欠佳，非輕易為此增產。然而因全球通脹高企引發潛在經濟衰退，或可抵銷部份緊張嘅能源需求。能源股理應唔會大幅回調，但難以複製今年回報。
能源股以外，排第二嘅ETF係Simplify Interest Rate Hedge ETF（US:PFIX），今年升70%。呢隻ETF基本上就係買利率期權，對賭長期利率上升引起嘅利率變動。根據基金簡介顯示，PFIX 的設計類似於持有美國二十年期美國國債的長期看跌期權。由於買利率掉期或期權過程及計算複雜，只有機構投資者涉足到，PFIX就成為平民都投資到又具透明度嘅利率對沖工具。
但美國面臨衰退，加上通脹見頂，明年央行再大幅及提速加息誘引已經唔大，因此再押注加息嘅嬴面應該細好多。
TUR：鶴立「火雞（Turkey）」群
排名第一，錢俊都感到驚訝。竟然世上仲有一個股票市場係升到癲咗，就係土耳其股市。美市唯一相關ETF就係iShares MSCI Turkey ETF（US:TUR），今年勁升80%。
至於點解土耳其可以鶴立雞群？有幾組數字可以留意嚇。第三季GDP增長7.6%，係主要市場中唔錯嘅數字。同時最新按年通脹達86%，而貨幣兌美元亦貶近30%。有意見認為當地投資者為咗對抗通脹同貨幣貶值，走入股市保值。如土耳其航空，今年股價已升六倍。
為防經濟過熱，一般央行都會加息抗進脹，影響股債市場表現，美國就係例子。但土國央行就反其道作出減息，股市就更火上加油。往績話俾我哋知，土國市場一向係炒家樂園，波幅一向甚大。但睇返過去五年，總回報仍然係蝕4%。
下星期同大家講最佳香港上市ETF。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com