上周五，以色列軍隊要求加沙地帶（Gaza Strip）北部110萬居民24小時內撤離，部署發動地面戰反擊，市場避險情緒升溫。
中東戰雲密布！上周五，以色列軍隊要求加沙地帶（Gaza Strip）北部110萬居民24小時內撤離，部署發動地面戰反擊，市場避險情緒升溫，資金周末前避入債
市、金市，國際油價急升。布蘭特期油高見每桶90.97美元，升5.8%；紐約期油高見每桶87.83美元，升5.2%。現貨金高見每盎斯1,932.93美元，升3.3%。美國10年期債息由4.7厘高位回落至4.6165厘；美滙指數靠穩，收106.67。美股個別發展，道指升0.1%，標指跌0.5%，納指跌1.2%；港股ADR比例指數低水0.7%。
美股外幣即時報價 多國新聞任睇
以色列50年嚟最嚴重戰事
近日國際焦點非「以巴開戰」莫屬！10月7日，巴勒斯坦激進武裝組織哈馬斯（Hamas）喺猶太教慶典「妥拉節」（Simchat Torah，喺住棚節Sukkot最後一日），突然向以色列發射火箭炮施襲，相信大家已經睇咗好多哈馬斯屠殺有幾殘暴、以色列反擊有幾猛烈、哈馬斯背後邊個撐腰、以色列有邊個盟友⋯⋯等等嘅報道，傳媒普遍指今次係以色列50年嚟最嚴重戰事（上次係1973年10月6日爆發嘅贖罪日戰爭Yom Kippur War），又指係以巴百年恩怨引致（1918年第一次世界大戰結束後，英國喺巴勒斯坦為猶太人建立「民族家園」）。
以巴勢不兩立 四千年恩怨難解
查實以巴恩怨何止百年，起碼4,000年！按《聖經》所述推算，公元前2090年，神呼召亞伯拉罕離開吾珥到應許之地迦南（現今巴勒斯坦，包括以色列、加沙、約旦、約旦河西岸）。亞伯拉罕有兩子——以實瑪利、以撒，前者係妻子嘅婢女夏甲所生，後者係妻子撒拉所生；前者係長子但屬庶子，後者係次子但屬嫡子；前者係阿拉伯人祖先，後者係以色列人祖先。公元前1050年，以色列12支派喺迦南建立王國，後被阿述同巴比倫所滅。阿拉伯國家（包括巴勒斯坦）同以色列嘅衝突，實質係應許之地嘅主權糾葛。
國際社會向來視以巴衝突為全世界最難解決嘅地區性衝突，除咗兩個民族對同一塊土地嘅主權之爭，仲關乎宗教，屬排他性問題！世界上三個亞伯拉罕宗教——猶太教、基督教（包括天主教、基督新教、東正教）、伊斯蘭教，都有信奉唯一真神嘅教義，亦都將亞伯拉罕視為信仰上嘅始祖。以色列人主要信奉猶太教、基督教，巴勒斯坦人主要信奉伊斯蘭教，三個亞伯拉罕宗教嘅共同聖地，係位於巴勒斯坦地區嘅耶路撒冷。為領土、宗教，以巴代代打生打死。
一旦以色列盟友美國對哈馬斯金主伊朗實施更多制裁，影響石油供應，油價勢必再飆升。
拉升油價及通脹 高息影響債市
以巴開戰對投資者有乜影響？過往所見，戰爭會令美元、債息、黃金、石油價格大升，股票大跌；但今次市場相對淡定，歐美股市上周連升3日到上周四始回吐，港股更到上周五始回吐。無論股票定美債、美元，波動幅度都低過此前美國就業報告公布後嘅波幅。金價此前已跌一波，今次升幅唔算大。至於油價，由於上月沙地阿拉伯同俄羅斯聯合減產已升一波，今次升幅相對有限。不過，場仗只係剛開打，一旦以色列盟友美國對哈馬斯金主伊朗實施更多制裁，影響石油供應，油價勢必再飆升，而油價飆升勢必重新推高美國通脹，高息環境可能遠比市場預計更長，經濟衰退可能終須來臨。
世界四大火藥庫——俄烏、以巴、南北韓、台海兩岸，頭兩個已引爆，北韓又不時試射導彈，台灣又將於明年1月舉行總統大選，政治對投資有影響，對香港投資者嚟講，戰爭感覺雖遙遠，但影響就幾貼身。中東戰火重燃，拉升油價、通脹，高息影響債市，繼而影響32萬港人認購嘅政府綠色債券（4273.HK）。綠債上周三掛牌，收100.4元，較發行價100元微升0.4%；但掛牌前夕，暗盤曾低見99.3元。無疑，美息或未見頂，綠債有破底風險；不過，買綠債通常係長揸收息，揸到尾可收回100%本金連同利息，期間債價波動並無影響。綠債為期3年，包底息4.75厘，喺現今資產增值困難時期，屬保本收息投資之選。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com