中環在線：股價露玄機TVB奧運傾掂數? - 李華華
近日倫敦奧運轉播成為電視業大戰話題，有線寬頻(1097)以為倫敦奧運呢個「好女」唔憂嫁，點知大婆同二奶台齊齊扭計，搞到呢項半個月之後就舉行嘅體壇盛事，香港個免費電視播放權到家陣都仲係送都送唔出。華華睇唔透究竟邊個電視台最有牙力，但單單望吓兩隻電視股嘅股價，明顯係身為大婆嘅電視廣播(TVB，511)攞咗頭彩啦！
大婆二奶唔妥協有線腳軟
TVB股價自從上月中見底後，就好似坐火箭咁升唔停，噚日仲高見60蚊，係自從千禧年後第一次見，就算個市下晝越跌越多，TVB收市都仲有1.3%進賬！魚缸友話係炒奧運播放權有變數，而事實上有線噚日即時腳軟，跌咗3.9%，論氣勢已經先輸一仗！
其實有線之前同兩個免費電視台傾過，不過開嘅條件就辣到冇朋友，要人哋播曬有線自家製節目兼廣告，結果咪激嬲咗大婆台囉，就算有線之後讓步，大婆都企硬唔妥協。原本以為二奶台肯放條國際台頻道出嚟就搞掂，點知二奶台話有技術問題搞唔掂，當堂玩死有線，皆因國際奧委會規定一定要有免費電視台播奧運。雖則有線噚日話只係剩番廣東落地嘅問題未解決，但二奶台都未出聲，唔知仲有冇其他手尾。睇嚟呢個殘局，都係要畀新政府嚟拆解㗎喇，不過都啱吖，呢排CY咁多嘢要拆，又僭建又政治炸彈，唔爭在拆埋呢瓣啦。
李華華
mailto:LiWaWa@AppleDaily.com
上一則: 內地電費補貼鋁企
下一則: 中環在線：陳氏浪漫伉儷今朝拍拖更 - 李華華
中環在線 - 李華華 舊文