金手指 - 孫柏文 2012年7月10日
金手指：解決歐債搵邊個 - 孫柏文
簡單問一條問題︰「現時歐洲出現了問題，你想了解多一點，或者希望畀些少意見，你會打畀邊個國家？」1.德國，2.法國，3.希臘。答唔答得出？打畀1，阿太默克爾，最終你會唔會要打埋畀法國總統奧朗德？打畀1或2，情況一樣。打畀3，死得，佢自己都唔識答你。
意債快到期要實
問答環節完，可以講，一個咁簡單的問題都答唔出。歐洲的問題是死症，因為歐元區根本唔應該存在。我們認識的歐債危機，不在於整個歐洲、歐盟，而是歐元區。由於唔係一個國家，他們的財政政策係各自為政的，冇得話財政轉移，想輕易出手幫下窮鬼都唔得。所以，一旦歐元區內某國家出事，就唔可以通過財政轉移的方式來幫手，因為出錢嘅係別國，而唔係統一的中央政府，所以絕對有難度。就係咁，2009年，最佳救希臘的時機就咁過咗，全因德國唔肯幫。
歐元區的財政政策同貨幣政策係唔一致的，因為有咗歐元之後，歐元區各成員國的貨幣政策權力，全部交曬畀歐洲央行，但係就依然有財政政策權力。於是乎成員國喺調整經濟政策時，係冇權插手貨幣政策，就係咁綁手綁腳，又一個經濟、政治遺留的畸胎。
早在02、03年，德、法兩國為了刺激自己的經濟增長，將國家的財政赤字擴大到佔國內生產總值的3%以上，兼且使橫手以免受罰。有了「榜樣」，你點會唔學？希臘、葡萄牙、愛爾蘭學到足。
雖然04年，德國可以將自己還原，但其他Followers，威完就死，攪到今時今日債台高築。希臘，唔該你起身走人，因為一開始，你就冇資格入歐元區。第三季，我們關心意大利就夠了，大把債未還。咁係咪要打畀意大利總理蒙蒂？定打畀腦殘巴洛迪利算數，橫掂傾極傾唔埋欄！
孫柏文
作者為獨立股評人
本欄逢周二、四刊出
上一則: 青心直說：未有新錢撐港股 - 胡孟青
下一則: 投資的天空：待穿位沽空銀泰百貨 - 張士佳
~TITLE_S~金手指 - 孫柏文 2012年7月10日 舊文