金融High Tea 2012年7月10日
金融High Tea——通縮時代點算好
2012年7月10日
港股可以話係「無名腫毒係咁跌」，早段仲好好哋跌唔多只跌百零點，內地公佈通脹率差過預期初時都無大反應，但過咗11點後就發瘟，短短15分鐘就插咗200點以上，後來低位彈都無力，收市再插向低位，收19428點，跌咗372點，跌幅1.9％，走勢偏弱，向下回補上周五由19000點急升的缺口。
中國昨日公佈數據，6月通脹幅(CPI)按年只升2.2％，遠低於5月的3％，亦低過市場預期，工業品出廠價(PPI)更按年跌2.1％，比5月的跌1.4％更差。數字差內地股市反覆回落，上證綜指跌2.4％，收2170點，沽盤急增，上海深圳成交1420億元，係近期新高。睇數字和消息，好似香港跟內地跌，內地數據早於9點幾就公佈咗，港股初時都無大反應，到11點後才突然大插，係港股拖住內地股向下，A股在下晝先至愈跌愈多。
電機器材股受惠
細心睇內地數字，又真係幾衰，6月通脹率是2.2％，大幅低過5月的3％，亦比市場估計的2.3％還要低。要注意這是和去年同期比較的數字，若看和上月比較的數字，6月通脹率按月跌0.6％，比5月按月跌0.3％大幅增加，當中食品跌價對通脹率減慢貢獻極大。工業品出廠價6月按年跌2.1％，按月跌0.7％，亦比5月按月跌0.4％加快。消費品和工業品價格齊齊急跌，中國已進入通縮時代。
數字差睇你點睇，德銀大中華首席經濟師馬駿就認為，通縮令政策放鬆的空間加大，溫總就話支持增長的政策將會加強。馬駿話從PPI分類睇，綜合發電機組、鐵路器材、電機器材、汽車配件，需求會受到國家政策支持。
通脹壓力由2010年1月開始籠罩內地，阿爺怕內地經濟過熱，全力加強調控措施，股市無運行。以做生意計，通脹年代最大好處是若果成本和銷售可以同步增加，公司唔使特別做嘢盈利都起碼有幾個巴仙增長，不過去到高通脹後期，成本未必可以全數轉嫁到消費者身上，就開始吞食利潤。由通脹轉入通縮年代，情況更差，價格開始下跌，需求大弱，但成本未跌得咁快(如勞工成本)，公司隨時蝕錢。阿爺放水救市，食唔應的行業仍然差。通縮時代，人民生活好過啲，但炒股選股唔易。
摩根大通日前話中央連環減息，流動性釋放，睇好內房板塊，預期板塊有10至20%的上升空間。不過總理溫家寶昨日就話要擴內需、穩增長的同時，「決不能讓房價反彈」，聽到呢一句，內房股全線打柴。龍頭股中海外(688)及富力(2777)跌3.5%，恒大地產(3333)及碧桂園(2007)插近4%。
雨潤毒發連環爆
昨日跌市焦點係近期謠言纏身的雨潤食品(1068)。日前有網民指控主席祝義材挪用50億元資金做大股東的地產生意。據內地傳媒報道，雨潤大力反擊，已於6月底以涉嫌「侵犯商業信譽罪」為由，向公安機關提交了報案資料，反擊上述謠言。不過，祝義材昨日突然宣佈辭去董事會主席等職務，令外界疑質祝義材可能引咎辭職。
雨潤壞事纒身，股價去年6月中還上過28.4元的高位，昨日再插9.8％，得番6.39元，股東真係喊都無謂。雨潤好似仲咗毒咁，食品價向下，股民感覺已經唔好，雨潤大老闆請辭事出突然，唔知水有幾深，真係怕佢股價低處未算低喎。
陸羽仁
上一頁 下一頁
金融High Tea 舊文