金融High Tea 2012年9月27日
金融High Tea——世上只有地產好
2012年9月27日
今日期指結算，昨日港股跟外圍回吐，上日美股杜指插101點，跌幅0.8％，上證綜指更跌穿埋2000點先至喘定，收市跌1.2%報2004點，港股跌171點又唔算跌得多喎，雖然兩度失守20500點，但收市都彈番少少，收報20527點，跌幅只有0.8％，比中、日股市都強。
昨日跌得最甘嘅繼續係比亞迪(1211)，該股被里昂分析員樂天虎(Scott Laprise)狂劈目標價95%至0.41元，做佢股東見到咁誇張的報告真係面都青，比亞迪上日仍頂得住，只係「微跌」3.7%至14.7元，但里昂大劈價報告至昨日至全面發揮威力，比亞迪昨日上午大插10.8%至13.12元，後略為反彈，收市仍要勁跌9.8%至13.26元，認真慘情。
里昂口術 比亞迪插
雖然比亞迪真係好衰，但照計唔使跌到0.41元呢種破產價啩？若然真係跌到0.41元，我都攞番1萬銀出來買吓玩吓，博阿爺入股將之國有化。不過話番轉頭，雖然0.41元的目標價好誇，但比亞迪本身都係周身傷，唔定止蝕位唔好去撈，定好止蝕位都好有機會一兩日就打靶。
唔好以為個市彈番少少人心好穩，其實一有壞消息即掟，所以大行報告威力極大，思捷環球(330)公佈的業績遜預期，券商事前預期純利會急升最多至12.7億元，結果僅符市場預期下限賺8.7億元，營業額更下降10.5%。
部份大行見到業績後唱淡，思捷午後急瀉，收市跌7%，為跌幅最大藍籌；同遭大行唱淡的恒安(1044)跌3%，成為第二大跌幅藍籌。
阿爺股市接連穿底，令港股卻振乏力，前日人民銀行批出有史以來最規模的逆回購操作放水入市場，減去到期的520億元回籠資金，都泵咗2380億元入銀行體係，但內地股市不升反插，皆因市場認為阿爺用逆回購放水，即係話短期內唔會減存款準備金率，市場唔太睇好。
純官講話 惹人憧憬
我見外圍跌市，港股低開，本來想等地產股插鑊勁，搵個低位撈吓貨，特別係隻新世界(017)公佈業績，若然急跌都可以買啲博吓大霧，點知佢低開少少跌唔多，跟住住一路炒上無回頭，收盤逆市大升3.5％，收11.96元，唔知係唔係好似我想博大霧的人不少，湧湧吓就湧咗上去。下午地主股全線升，恒基(012)升2.3％，信置(083)升1.8％，長實(001)跌0.4％已經係最弱，但都跑贏大市。
我同中環茶友傾起，地產股呢個異象有原因，而家做生意真係唔係咁易，又話最低工資要加到30蚊，又話租金加，做老闆唔係咁易補番條數，唯有自己硬食，頂唔順就摺埋。想深一層，地產股真係其中一個最好搵的行業，租金加得快過最低工資，我聽講銅鑼灣某某廣場有些舖頭租金加咗幾倍，做收租佬面對加最低工資都係無有怕。賣樓就更加唔驚，樣樣加通脹升，令人相信只得磚頭可以保值，樓價升得仲多，快過起樓成本的升幅好多。難道做生意真係「世上只有地產好」？
新世界(017)業績唔錯，話事人純官講到佢哋早幾日從市建局投得旺角波鞋街重建筍盤，投資額係40億元。
純官身為「梁粉」，新政府上場佢運勢都好似轉埋，佢自己就咁解話，過去集團投標發展項目取態較保守，未來會積極發展本港住宅業務，購置更多土儲。
，佢咁講又令人對新世界多咗憧憬喎。
陸羽仁
上一頁 下一頁
金融High Tea 舊文