金融High Tea 2013年1月17日
金融High Tea——拍完心口 地產股升
2013年1月17日
昨日港股表面上受《施政報告》困擾，其實受內地股市拖累，早上《施政報告》無壞消息，港股已經升唔起，到下午一點幾時內地股市大插1.7%以上，恒指最多跌177點，之後跟住內地反彈，恒指全日微跌24.52點，收報23356點，成交735億元。
內地股市下跌應是急升後的回吐，上一晚工行(1398)宣佈，董事會批准新增發行不超過600億元人民幣等值減記型二級資本工具(簡單講可以係可換股債券)。阿爺的商業銀行資本管理新規定剛在今年初生效，銀行要增加資本，按內地的說法，工行成為「第一個吃螃蟹的人」。
工行集資拖跌內銀
講到集資市場就唔高興，即使唔係批股，發可換股債都唔啱聽，但昨日內地開市都唔係跌得好厲害，只是午後愈跌愈急，跌得多的都是早前狂升的概念股如甲型流感概念股、環保概念股等，升得急回吓好正常。工行在香港只係跌0.7%，反而其他不少內銀股仲跌1%以上，農行(1288)仲要跌到2%。
內地3點收市後，回歸香港題材主導，就見到最有力的係地產股，長實(001)升2%上130.1元，再創52周新高，新地(016)升1.4%到125元，距離上周三所創的52周高位125.7元，只是一步之遙。
地產股昨日上半場都唔敢郁，怕振英哥在《施政報告》有辣招，多隻地產股都在尾市才起步，炒友好似睇完《施政報告》後，再睇埋振英哥個記者會，證實無辣招才出手炒上。
振英哥的《施政報告》被評為務虛，唔止無錢派，唔多見具體或即時的政策，在房屋方面着墨頗多，主要係搵地起屋。後來振英哥在記者會上再補充除咗土地之外，樓宇供應會點樣，指政府由去年7月至12月批出的預售樓花同意書約有7,885個，計及目前已批准的1.2萬個，本港目前的可供預售的單位約2萬個，加上在建中的7.5萬個公營房屋，落實短中長期的房屋供應，該7.5萬個單位會加快興建。
最好笑係特首記者會上，有記者要求梁振英拍心口保證達到建屋目標，否則不連任特首。振英哥自然帶記者遊花園，話「拍心口」應承大家，指房屋政策是重中之重咁話。
持貨力強政府無符
特首拍完心口，地產股照升，證明市場只係睇《施政報告》的措施有乜短期效果。證券界普遍認為政府目前搵地，起好樓都要四、五年以上，遠水不能救近火。政府發咗售樓同意書批准咗發展商可以賣的2萬個單位，賣唔賣權在發展商之手，逼唔到出來，結論係一兩年內短期供應難大升，所以樓價升跌，睇美息多過睇政府土地政策，《施政報告》並不利淡樓市。
當然，我哋唔好認為政府無招，政府要用行政或稅務或按揭措施壓抑樓價，仲有好多加辣方式，最簡單係再減按揭成數或加稅，就可以令樓市成交更冷，問題係成交減少，無論發展商或物業揸家都持貨力強，美國一日唔加息，樓價唔係咁易跌落去。
若然係咁，《施政報告》出埋，樓市短期少咗頭頂一把懸劍，只要大市配合，地產股仲有得去吓，個個話誠哥唔想振英哥上台，結果短期打唔低樓價，自然打唔低長實股價，?家就要估估長實高位去到邊啦，長實?家130.1元，歷史高位係2007年10月見的159.5元，歷史第二高位是2011年1月見的137.5元，現價升多6%就到，我估都好有機會先試穿2011年高位喎。
陸羽仁
上一頁 下一頁
金融High Tea 舊文