金融High Tea 2013年1月22日
金融High Tea——內房股王側門上市
2013年1月22日
每個月中段都係唞氣時候，昨日香港和內地市況都比較呆，上證綜指升0.5%，港股收市微跌11點收場，成交縮減650億元。在市底仍強的情況下，中資股板塊輪流炒，前排炒中資金融股，近期資金轉移陣地炒落後內房股，早前批股下插的恒大地產(3333)反彈1.4%至4.36元、富力地產(2777)升3%、恒盛(845)升7%，最癲嘅係星獅地產(535)昨日飆升13%，星獅唔夠一個月，股價由0.42元抽上昨日的0.89元！
境外融資內地搶地
過去短短的半個月，多家房企巨頭齊齊宣佈抽水計劃，估計合共50億美元(387億港元)，市旺時市場睇抽水行為都唔係睇得咁壞，話內房股抽水籌集的資金，大都用作增購土地儲備上，多家開發商在2012年淡市銷售成績都唔差，今年紛紛提高年度銷售目標，無水去吸土地儲備唔係幾掂。
業界指房企傾向於境外抽水，原因係境外融資以企業為載體，融得資金，可以通過註冊資本金或者增資的方式，進入境內的使用用途不受限制，而且境外融資利息較低，所以房企都喜在境外抽水，而在港有上市公司，更加方便吸水。今次到海外上市的主角係內房股王萬科，仲係用B股轉H股的形式。
內地除了A股外，還有專供外資買賣的B股，成交一直呆滯，最近搞出一個B股轉H股的出路，去年中集集團(2039)成功B股轉H股，亦未引起多大關注，但今次萬科公佈B股轉H股方案，就引起注意，萬科以13.13元人民幣作現金選擇畀B股股東，如果佢哋唔想揸或者唔合資格揸H股可取現金，此價錢比萬科B股停牌前有5%溢價，但結果萬科A及B股昨早復牌同時漲停，萬科B股收13.75元，比現金選擇價高4.7%，顯示投資者對轉板香港H股有憧憬，仲搞到昨日深圳B股大升4.7%。
萬科真身非南聯殼
香港股民或者唔係好識萬科，佢係內地房企大阿哥，以去年為例，雖然若論合同銷售面積計，恒大(3333)去年售樓面積1536萬平方米全國第一，以真正入袋的銷售金額計，一哥是萬科，佢去年銷售金額按年增加17.2%至1418億元人民幣，由此可見佢賣啲樓貴過恒大好多，去年售樓超過1000億還有排第二的綠地銷售1078億，排第三的保利全年銷售1018億元。至於在香港股市稱王的中海地產(688)去年銷售896億元。
萬科去年用10.8億買咗南聯地產隻殼，剛改名萬科置業海外(1036)，當時外界期望萬科借呢隻殼將內地業務注入在港上市，如今見到佢B轉H，才知真命天子是那隻H股。昨日萬科置業改名，大升13%，收16.98元，雖然佢孭住萬科個金漆招牌，不過?家萬科分工佈局好清楚，萬科置業海外只做海外業務，而且按借殼上市依規定，要等上兩年時間才可透過萬科置業海外融資，小心隻股炒得過熱無消息跟尾會回吐，所以更應該炒的是未來B轉H的萬科。
內房股王萬科借B轉H的側門來港上市，料會掀起一番熱潮，因為每逢大股來港例必惹起注視，雖然萬科不是行正門上市集資，但呢個側門勝在快手，若來港上市後好受歡迎，香港監管機構又開方便之門，萬科H股好快就可以批股集資，必惹起久未做大生意的投行如蟻附羶，對內房股短期市道，有正面影響也。
陸羽仁
上一頁 下一頁
金融High Tea 舊文