金融High Tea 2013年1月25日
金融High Tea——地產新時代
2013年1月25日
美股連升六日，中港股市就有點企唔住腳。A股衝高回落，恒指朝早彈一彈，跟住打回原形。恒指收23599點，跌36點；國企指數跑贏恒指，跌71點至12096點。大市成交789億元，同上日差唔多。
支撐大市的力量主要來自地產股，恒生地產分類指數逆市漲0.7%。萬科置業(1036)夥拍新世界(017)以逾34億元，超市場預期上限18%投得荃灣西站六區項目。此外，港鐵輕鐵天榮站住宅項目收到至少8份意向書。
樓價有機再上一層樓，刺激地產股造好。新世界低開1%，好快就發力向上，收市倒升2.6%至15.04元創52周新高。萬科置業無起跌。新地(016)同樣創52周新高。
新世界變概念股
萬科同新世界呢個交易金額唔大，意義卻唔小，背後反映香港地產市場未來一個重要主題，就係內企進軍香港。萬科老闆王石行事高調，令好多人以為佢係民企，其實佢主要股東係華潤，內地好早就當佢係半隻國企，今次佢初嚟埗到，拍住地頭龍一齊搵食，用意好明顯，就係為日後大舉出擊試水溫。
萬科半年前收購咗南聯隻殼，本來大家以為佢會慢慢嚟，因為借殼公司上市集資有限制，點知話咁快就傳出投地消息，南聯變身的萬科海外仲停埋牌𠻹，呢個動作相信會令公司復牌以至其他地產殼有得炒。
有人形容今次投地結果，會否重現內地樓市國進民退的現象呢？香港樓市由華資地產股打晒骰，將來就多咗幾隻大蟹乸爭食，隨時鬥到七彩。中環茶友話，本來新世界高價搶地，對股價未必係好消息，但佢昨日軟一軟又搶高，皆因大家睇好佢泊埋內地巨企一齊搵食，呢個概念短期大有想像空間，令佢逆市而上。
萬科去年在大陸賣樓銷售超過一千億人民幣，作風非常進取。內房一哥終於來港發圍，反映咗市場大氣候，未來香港地產市場競爭肯定加劇，唔再係幾個華資玩晒，未來可能會影響發展商利潤。不過，即時影響係好多人爭地，地價隨時爆上，手頭已有大量地皮的地產股，身家即時上升，至於日後點爭，就係日後的事。
市場近日聚焦在中央提出的九大行業合併重組方案。包括鋼鐵及水泥等受惠行業龍頭股聞風起舞。鋼鐵股上日表現強勁，旺丁旺財，其中首長國際(697)抽升近一成至逾十個月高位。備受市場關注。
榮揚獲羅旭瑞捧場
昨日中鋼協表示，受惠經濟增速加快，預料今年內地鋼材需求增幅加快。按年升幅加快0.6個百分點至3.1%。協會認為，鋼材庫存續降，市場壓力有所紓緩，但鋼鐵行業仍然面對產能過剩和供大於求局面，鋼材價格難以大升；加上國際市場貿易摩擦增多，鋼材出口難度加大。
鋼鐵股昨日全線回軟，首長國際升得多亦跌得多，回軟3.3%，鞍鋼(347)跌2.5%，馬鋼(323)回順1.8%至2.68元。
新股近日回暖，新股榮揚(2078)傳出獲長和系主席李嘉誠認購，不過，長江實業(001)發言人表示，李嘉誠和旗下公司沒有認購榮陽新股。反而富豪集團主席羅旭瑞就話，將會認購榮陽，但未有透露以個人或上市公司名義認購，同時亦未有透露認購金額，僅表示適當時候將會披露。厔於另一隻新中鋁礦業(3668)招股，據市場消息表示，每股定價1.75元，屬招股價指導範圍中間水平。
陸羽仁
上一頁 下一頁
金融High Tea 舊文