投資的天空 - 張士佳 2013年2月22日
投資的天空：震倉兇狠唔易捱 - 張士佳
約一個月前，筆者曾從媒體中聽到兩會前大市通常會升，但當想到兩會前的時間，通常就係農曆新年假後，便覺得奇怪，因為新年後大市多偏淡，於是打開圖表，發覺以上說法不太站得住腳。
A股都叫間中有不俗升幅，但以港股而言，好多時都無力上升，更多是橫行及下跌。本欄亦有約略提及此統計，所以對近日的調整大家應有所準備。
唔舒服應先減磅
另外，先前跟大家提及根據過往的統計，年線圖從未出現裂口，如此數據延續，應至少見22800點水平，巧合地，昨日期指低位是22800點，所以以當時市況而言，調整的目標是達到了。
但前日筆者再補充，如大市守不住23000點，有機會再跌多800至1000點，所以調整再深一點都唔出奇。
經昨日一跌，又係考驗投資者信念的時候，我成日話，牛市好似好易賺錢，但由於震倉時非常兇狠，要坐貨都唔係咁易，現階段要驚並唔係時候，因為由24000點開始計，大市已回調了1200點，若以筆者統計，暫時睇亦只係跌到22000至22200點水平，手中的個股可能要捱嚇價，但捱得過遲點應會有收成。
當然，如閣下本身overtrade，或者覺得再跌會好唔舒服的話，最好就先減至一個唔太影響心情的水平，等待利好訊號之後再慢慢吸納。
至於應吸納甚麼板塊，筆者暫時無法太具體，因為現時強勢的板塊，不代表在調整完成時也一樣，只能說在近日偏淡的市況下，仍有力向上或跌唔落的，現階段大家可以花多點時間研究，因自己都相信當中總有兩、三個會跑出。
不如先列出幾個好讓大家可以在周末做功課的板塊，包括頁岩氣、燃氣、家電、新能源、環保等。
張士佳
元大寶來證券(香港)業務及商品發展總監
與曾卓鋒(元大寶來證券(香港)客戶經理)聯合執筆
(逢周三、五刊出)
上一則: 青心直說：盈警當盈喜抵鬧 - 胡孟青
下一則: 炒友Blog：調整未完候低吸好股 - 邱古奇
投資的天空 - 張士佳 舊文