金融High Tea 2013年2月22日
金融High Tea——大鱷等開餐
2013年2月22日
如果話市場憂慮聯儲局可能提早退市，不如話好多大鱷伺機炒退市至啱，聯儲局公佈一個無乜意外的議息會議紀錄，一如以住有少數委員建議提早退市，商品匯價齊插，美股杜指借機跌108點。禍不單行，內地又怕阿爺調控樓市，上證綜指暴跌近3%，拖累恒指勁跌400點，失守23300點，跌市成交擴大到814億。
美股雖然急回，但尚近高位，昨日金價、匯價、油產、金屬價都大插，我估有一班大鱷蠢蠢欲動，等住炒美元回升開大餐。我話係開大餐，因為佢哋睇住好深的水位，炒作商品、匯價打回原形，例如金價高位1900美元，?家回到1568美元，但2007年風暴發生前只有600美元，下行空間好大；又例如銀價，2007年得14美元，?家仲有28美元；睇埋油價，?家94美元，2007年經濟好熱時都係60美元，再早幾年只係30美元。?家聯儲局雖然郁都未郁，大鱷都偷步入咗市先，先落部份注碼，有點平貨在手，到時美元一升就追沽商品啦。
當然，班大鱷可以炒錯，例如美國經濟未轉好，聯儲局無咁快停手，但大鱷搶先炒個勢咁狼，你唔好俾佢估中，否則大風浪可以瞬間出現。
商品倘爆泡影響大
我早前叫大家唔好買金股，都無錯，?家繼續係咁講，佢哋或有反彈，但若你走唔切，下一浪又可以行深好多，你無定止蝕強硬執行就會被套牢。推而廣之，揸咗金屬股、資源股都要小心。
你問我點睇股市，正如早前所講，1月升得多，2、3月有回吐好正常，但現時回吐的幅度比我想像中還要大，主要是上述隊商品、隊匯市的波浪比想像中大，要小心商品會否爆泡，拖住股市落。若然商品只是回吐而未爆，3月股市應該還有一個後抽。
換個角度睇走勢，恒指亦去到關鍵位，本周恒指10天線跌穿50天線，出現死亡交叉，過去久不久都出現這種情況，但若下穿不深，還有機會再有一浪向上，所以未來後市幾關鍵，若在22600、22700點有支持，走勢還好，若連22000點都穿埋，就要極度小心，下跌之勢已成，應該趁反彈時沽貨。
除了環球金融市場的大氣候外，本地資金較多，內地有意調控房價，形成一好一壞因素。溫總日前召開本屆政府最後一次國務院常務會議，針對近期部份熱點城市房價上漲趨勢明顯，推出調控樓市新「國五條」。包括：一、完善穩定房價工作責任制；二、堅決抑制投機投資性購房。要求各省市及時推行限購令及嚴格執行差別化住房信貸政策，更要擴大個人住房房產稅改革試點範圍；三、增加普通商品住房及用地供應；四、加快保障性安居工程規劃建設；以及五、加強市場監管等等。
小心百麗轉勢
分析普遍認為新「國五條」定調較以往嚴厲，但沒有新意，內房股前陣子已經大跌了一浸，昨日個別發展，中海外(688)及華潤置業(1109)反彈0.9%及1.4%；恒大(3333)及富力(2777)就齊插超過1.5%，內房股算係跌得比較少。
昨日跌得最多的是鞋股百麗(1880)，佢預料「去年盈利將輕微增長」，股價馬上大插17%。佢跌咗咁多市盈率仲有24.5倍，記住市盈率高係因為市場接受盈利高增長的股票可以貴啲，若百麗無乜增長，點值20幾倍市盈率？小心百麗無論股價或盈利都見咗頂，如今正在轉勢中。
陸羽仁
上一頁 下一頁
金融High Tea 舊文