抽到你乾
2013/2/5 上午 09:28:48
網誌分類: 經濟
歐洲政局出現暗湧，西班牙首相拉霍伊Mariano Rajoy惹貪汙醜聞，西班牙國債收益率突破5%，而意大利大選在即，亦令市場擔心下一屆政府可能改變蒙蒂(Mario Monti)推行的經濟措施。政治不穩，拖累歐股大跌，西班牙及義大利股市分別更插3.8%及4.5%，法國跌3%，德國亦挫2.5%。
歐股咁跌法，美股都好難有運行。加上美國12月工廠訂單增長1.8%，低過市場預期的2.3%。經濟數據唔係幾靚仔，美股終結連續五日升勢，杜指及標普500指數失守萬四點及千五點大關。杜指開市跳水，之後彈都唔彈，在低位橫行到收市，收跌130點，13880點；標普500指數跌17點，造1,496點。
個股方面，市場的焦點係戴爾(DELL)私有化，而微軟(Microsoft)會投資約20億美元，協助戴爾反攻平板電腦市場，詳情或會於今晚宣佈。《紐約郵報》報道戴爾私有化交易的價格將在每股13至14美元，少過市場預期的每股15至16美元。DELL昨日跌2.6%至13.27美元，私有化交易對戴爾的估價約為235億美元，而戴爾的市值曾一度超過1000億美元，智能手機興起在先，平板電腦流行在後，一波又一波搶佔桌面電腦的市場，戴爾股價低迷都無計啦，私有化係唔有著數，都要睇戴爾住後業績能否翻身。
杜指回調超過100點，大市是否到頂，美國互助基金公司巨頭先鋒基金 (Vanguard Group) 的創辦人兼董事長 John Bogle又睇得好樂觀，認為股市在未來 10 年是主要的「收益製造機」，未來10年投資股票，估計「非常非常可能」有100%回報(每年7%)，而投資債券的話，10年就只有35%。
John Bogle觀察到一個現象，散戶投資者正陸逐將資金撤出從積極管理基金，轉投到指數基金，主要原因係投資者覺得積極管理基金搵笨，收費高，但回報低。Bogle認為大市雖然已經升到接近海嘯前高位，但仍未到頂，原因係大部份散戶對重新入市仍然意興闌珊，未見散戶資金大量流入，佢鼓勵專業投資者可以趁專搭尾班車的散戶蜂擁入市前繼續高追。佢咁睇好，真係信不信由你啦。
現時港股大小主要股東就唔係咁睇好，吸水情況愈來愈烈，繼匯控(005)
沽出總值超過600億的平保(2318)股票後，中石化(386)昨晚近11時宣佈大折讓配售新股，是公司自2000年上市以來首次配股抽水，集資額240億元，數目唔細。配股價為8.45元，較昨日收市價9.34元有9.53%折讓，折讓亦有。由於呢次批股佔中石化發行股數佔已發行H股數17%，中石化股價肯定會受壓。 不過中石化批股可能只為收購阿媽資產，道瓊斯上月曾報道，中石化計劃從母公司中石化集團，以80億美元(約624億港元)作價收購上遊油氣資產，包括母企在英國、俄羅斯、哥倫比亞及哈薩克斯坦等國家的上遊資產，相關收購擬於4月進行，中石化藉此增加自己在油氣市場的參與度。
無論如何，匯控沽平保和中石化批股，已吸水650億，雖然平保股票是一手批予蔔蜂，但沽貨者睇淡後市的態度明顯，肯定會影響市場信心也。而且不斷咁抽水抽下去，只要新水來港一減慢，市場資金好易被抽乾。
陸羽仁
回應(0) 我想回應
陸羽仁 BLOG 舊文