金融High Tea 2013年2月5日
金融High Tea——樓市只是遠程睇淡
2013年2月5日
■近日有地產發展商私底下都紛紛話，樓市無可能可以長期咁升落去。資料圖片
■滙控賣平保拖咗一段日子終於成事，瑞銀就出報告話滙控正接近轉捩點，並調升目標價。資料圖片
港股出現升市陷阱，美股杜指上周五突破萬四點，你以為港股會有番啲作為，咁就錯啦。恒指早段最高升224點，全日最高的23945點，升幅本來已經唔係咁勁，恒指仲好快掉頭回落，到三點半尾市更來個高台跳水，不但無得升，仲要倒跌37點收場，收市報23685點。大市總成交1282億元，當中包括匯控(005)批畀泰國正大集團的平保(2318)股權共614億元。
恒指由萬八點升到近期接近兩萬四，在這些大位之前，恒指「窒吓窒吓」，投資者十分觀望。股評人曹仁超仲係好樂觀，佢日前出席慈善講座時話，美國杜指出現突破，確認恒指有力升穿24000點大關已是不爭事實，今年上半年升至27000點無走雞，建議投資者「換馬」至藍籌股咁話。
港股食粥食飯睇外圍，其中主要係美股，只要美股接續上，港股即使係矮仔上樓梯，好慢咁升，都要跟住行，但若然美股回吐，港股短期先回試23000點，也是很容易之事。
地產商無大好友
現時港股預測市盈率11.1倍，其實唔算癲，樓市癲好多，但即使是咁貴的樓市，都無人覺得佢好快會爆。陸羽仁近日同過幾個大發展商食飯，發覺無論有無投地的發展商，都無人覺得樓市可以長期咁升落去，可以話「遠程睇淡」已成為市場共識，無人係大好友睇樓市長升不止。睇得最好的是一個投咗大塊地的發展商，佢話去到2015年就會跌啦。
另一個投地唔算太勇的發展商估得好具體，話而家中小型住宅先抽升，然後今年下半年豪宅仲有一浸上，升埋豪宅，個市都差唔多啦。佢舉將軍澳為例，未來有2萬5千個單位供應，而家地價都要5000幾元一呎，加埋起樓成本都要7、8000元，將來點賣呀？
有個中型發展商睇得更淡，話如果你見到發展商投到巨型地皮，都係唔好揸佢啲股票啦，發展商投到地起得樓來都2014、2015啦，到時個市都冧咗啦。佢自己就唔再投地，見有啲細物業例如一個商場，一幢大廈，買來炒吓就得，都係博幾個月轉手執10幾個巴仙就走。
呢啲係發展商的真實睇法，由於佢哋唔係公開講嘢，有一定參考價值。「遠程睇淡樓市」的觀點，開始成為主流，但既然無人預會即刻跌，昨日地產股都係個別發展，近排較勇的新世界(017)仲升2.3%。
匯控好過平保
匯控批售手上15.57%的平保股份予正大集團的交易，拖咗好耐終於成事。平保從去年12月起，股價由57元上升至目前約70元，已有近23%的升幅，相信短期有一定的回調壓力。
我睇平保亦睇得淡少少，平保有啲政治風險，《紐約時報》指總理溫家寶家族擁有的巨額資產中，最大部份是平安保險的股份，對此多所質疑，雖然被溫家寶否認，但唔知事件斷尾未。昨日平保高開2.5%後卻後勁不繼，跟住不斷下滑，收市倒跌2.8%至68.9元，係近全日最低位，顯示借勢出貨的人都不少。
買平保不如買沽咗佢的匯控(005)啦，瑞銀發表報告，話匯控正接近轉捩點，經過大規模重組及出售資產，相信匯控已接近去槓桿化尾聲，可以增加派息予股東。瑞銀將匯控目標價由82元上調9%至89元，評級仍為「中性」，仍未計若未來兩三年美國如加息對匯控有利好影響。
陸羽仁
上一頁 下一頁
金融High Tea 舊文