金融High Tea 2013年3月14日
金融High Tea——都係收水惹的禍
2013年3月14日
美國杜指六連升，內地A股就五連跌，世事何其妙。內地唔掂港股都無運行，內地上證綜指昨日跌1%，香港國企指數就大插2.3%，恒指亦受累，上日跌完200點，昨日再暴挫333點，跌至22557點，上日失守10天線，昨日連20天線也保唔住，表現仲弱過A股。沽壓轉重，全日成交上升到736億元。
周小川加力壓樓價
內房股及中資金融股拖累大市，和內地近日的收水格局有關，人民銀行行長周小川昨日在記者會時的講話，就有點火上加油的作用。有記者問及中國2月通脹率升至3.2%的問題，周小川話，數據公佈前金融機構預測大概在3.0%、3.1%左右，實際報出來是3.2%，略高於大家的預期，因此我們打算通過貨幣政策等其他措施，希望能夠穩定物價、穩定通貨膨脹。
周小川講到樓價時更嚴厲一點，話針對房價有一些結構性的政策如首期比例，還有專門針對房地產的價格調整措施，還會繼續使用，「有的還會繼續加大一定力度」。聽聞內地開人大政協會議時，代表們第一關心的是樓價，第二、三是環保和食品安全，所以中央壓樓價絕不手軟。
深圳更傳出政府將推出「限漲令」，話今年發展商賣樓開價不能超過2月的水平，雖然當局否認，但市場唔係幾信，內房股跌到七個一皮，龍頭股中海外(688)及潤置(1109)分別挫3%及4%；深圳控股(604)、融創中國(1918)、佳兆業集團(1638)齊插超過7%，綠城中國(3900)更暴跌近一成！控樓價收銀根亦不利內銀股，四大國有銀行齊插超過2%。
內保股跌得更慘，內地媒體報道，中央將加緊監管內地銀行及郵局等保險代理銷售行為，例如唔可以向70歲以上老人推薦任何保險產品、不得向60歲以上客戶銷售超過其年收入20%的期繳產品等等。銷售對象受限制，生意自然大受打擊，其中新華保險(1336)跌超過半成。
中環茶友話，內地收水打壓樓價，港股仲跌得多過內地，似乎唔止跟內地跌喎，估計特區政府打擊樓市的措施開始發酵，加上旅遊消費跌緊，可以話「都係收水惹的禍」，內地又打，香港又打，真係打到內傷。茶友唔係咁睇好後市，話上半年高位已見，對中長線投資者而言，家唔係低撈的時候，反而若有顯著反彈可以再減啲貨。
嘉里焗賭高價投地
本地地產消息好壞交雜，傳聞已久的銀行加按揭利息終於落實，匯豐銀行宣佈調高新做按揭利率0.25厘，加得唔多但就揭開樓按加息的序幕。不過昨日有單消息幾逆大勢，嘉里建設(683)公佈，以116.9億元投得何文田住宅地皮，呎價10000元，造價是市場預期高位。
該區屬於傳統豪宅地段，可說是何文田地王。市場早前估計長實(001)減價賣樓，都係儲子彈想投呢幅地博執平貨，點知雖然市道回回哋，嘉里還是如此勇於出價。
市場估計，地價加埋建築費等開支，三年後賣樓唔到14000、15000元以上都無乜肉食，誰估到三年後係乜嘢世界，所以唔好話嘉里呢條過江龍唔進取，但佢哋不似本地大發展商有大量低價土地儲備，要玩就焗住出高價去搶大地塊。樓市升足五年，過去都係勇者勝，如今唔止用家，發展商都要焗賭，今日睇吓嘉里升定跌，就知市場認唔認同佢去博啦。
陸羽仁
上一頁 下一頁
金融High Tea 舊文