金融High Tea 2013年3月20日
金融High Tea——轉中國睇法
2013年3月20日
■塞浦路斯最新方案不對小存戶徵稅，但存款10萬歐羅以上徵稅15％。美聯社
塞浦路斯存款收高稅「打荷包」計劃，引發市場恐慌，恒指上日勁跌後反彈，昨日反彈無力，恒指先高後低，中午倒跌30點。午後一度隨內A股反彈，但歐洲開市偏軟，恒指再度轉弱，打回原形。恒指收報22042點，跌42點，又係一個單日轉向的走弱形態。
雖然無乜香港人在塞浦路斯存錢，係俄羅斯巨富在當地存錢多，但一眾中環人對此事討論不休。塞浦路斯最新方案不對小存戶徵稅，但存款10萬歐羅以上徵稅15％，真係嚇死人。中環人個個有米，在銀行存巨款者不少，聽到塞浦路斯存戶要畀15％稅呢個咁新嘅概念，唔關自己事都要講番兩嘴，綜合各方意見，呢個故事教訓我哋，第一，銀行賭輸咗，竟然可以叫存戶賠，呢個係乜嘢世界？銀行賺大錢時賓卡分哂花紅，家輸錢就叫存戶埋單。第二，以後唔好話在銀行存款無風險，在利息超低的年代，真係風大雨大時(唔知會唔會再出現)，可能放現金在銀行保險箱，唔要利息，安全過存錢在銀行。第三，唔好以為塞浦路斯單嘢無後遺症，即使國會過咗，大存戶畀人抽咗15％重稅，之後都會調錢走人，點知你會唔會衰多次抽多次稅？家歐羅區弱國的銀行存款都會走，去德國或美國，所以塞浦路斯單嘢有深遠的後遺症。
多國狙擊匯控洗錢
傳聞歐羅集團要塞浦路斯大存戶畀重稅，因為佢哋認定當中有好多俄羅斯人在當地洗黑錢。講開黑錢，大笨象匯控(005)近日被全世界政府以涉嫌洗黑錢狙擊，好有四面楚歌味道。日前被印度開file調查，昨日阿根廷政府又宣佈，對匯控阿根廷子公司HSBC Bank Argentina SA提起訴訟，指控稱該公司幫助他人逃稅和洗黑錢獲利約1.21億美元，雖然銀碼唔大，但好似搞極未完。匯控全球裁員之餘，繼續出售唔賺錢的海外業務，據報匯豐加拿大將出售投資組合總值約4.95億加元的消費者私人標籤信用卡組合業務予多倫多道明銀行。市場可能較注意匯控出售資產的消息，佢昨日靠穩，微升0.3元，收84.45元。
摩通唱淡 叫減持中國股
內房股反彈，內銀股繼續拖累大市。其中工行(1398)及建行(939)再跌超過1.3%。摩根大通昨日發報告唱淡中國股市，將中國股市的評級降至「減持」，並建議投資者沽空中國四大銀行的衍生產品，主要理由係中國經濟增長放緩和通脹加速。
摩根大通首席亞洲和新興市場分析師莫瓦特指「中國經濟的增長勢頭現在正在放緩，政策對應措施受制約，這是一種很不利的組合。」他認為2013年中國工業產出的啟動勢頭是2009年以來最疲軟的，此外零售額增長放緩，通脹超出預期。中國房價漲幅創下2011年12月以來最高，政府防止房地產泡沫的努力遇到挑戰。摩通另一名分析員Katherine Lei則估計中國可能在今年內緊縮流動性以限制通脹。另外野村控股上周亦指出，信貸急速增長、房地產價格高企和潛在的經濟增長率下滑已提升中國發生金融危機的風險。前景充滿不確定性。
中環茶友話，年初外資大多睇好中國新政府上場會放水，家出咗一系列數據，睇到中國政府唔止放唔到水仲要收水，正轉變對中國股票的睇法。小心外資咁轉法，令中國股票反彈後仲有下行壓力。
市場氣氛烏雲蓋頂，又係公用股發威嘅時候。恒生公用分類指數逆市勁升2%，全賴公用股頂住，恒指至跌咁少。煤氣(003)日前公佈業績，去年收入升11%至249億元；純利按年增長近26%至77.3億元。每股盈利升至88.9仙，建議末期股息23仙，連同中期股息12仙，全年共派息35仙，另外亦配發紅股十送一。煤氣業績理想，主要受惠國內業務表現強勁，去年總售氣量約119億立方米，較上年度增長15%，燃氣客戶已增加至約1482萬戶。煤氣將由4月1日起，調高本地煤氣標準收費4.6%。德銀升煤氣目標價至17.3元，評級「持有」。煤氣昨日漲1.1%，收22.6元。我認為煤氣側側膊加價成功，來年仲可以享受。
陸羽仁
上一頁 下一頁
金融High Tea 舊文