金融High Tea 2013年4月22日
金融High Tea——市場先生聽佢講
2013年4月22日
股市美妙之處，在其不可測性，港股跌到咁上下，突然又來一個大反彈，上周五恒指大升501點，升幅2.3%，你睇淡順住追沽，大市一個回頭又被佢夾死。
見到股市升股民一定要搵一個解釋，上周五升市最普遍的原因都和內地有關，包括傳聞人民幣合格境外機構投資者(RQFII)額度重新啟動審批，又傳人民銀行一星期內會公佈擴大人民幣匯價波幅，另外摩根士丹利資本(MSCI)會把內地A股納入MSCI新興市場指數，內地上證綜指上周五急彈2.1%，皆利好港股。
我唔係話呢啲消息唔利好，特別係內地股市升2.1%都係好消息，港股跟升亦都好正常，但我性格多疑兼辯駁，又走去拗吓，港股升幅2.3%，仲多過內地的2.1%升幅，而國企指數大升3.1%咁誇張，家話將A股加入MSCI新興市場指數(仲要一段時間才可實現)，又唔係講港股，點解我地要升得多過內地股市？過去唔係無見過內地股市升好多、我地升少少的情況，有時仲衰到等內地下午三點收市後跌番轉頭。所以港股大升，唔可以話純粹因為A股升，要港股「想」升至得。
應跌不跌 大戶平倉
所有表面上講唔通的事情，都可以用「市場先生」四個字解晒，要明白股市長期走勢唔一定要信晒市場先生，仲有個「基本因素太太」話事，但短期走勢就係由市場先生說了算。呢位市場先生好比一個愛炒股的非理性男人，唔理基本因素，行為無性，但睇深一層，佢行事方向都有路可捉。
我上星期頭都講過，黃金暴跌後，美股等外圍股市插低，但港股有少少應跌唔跌的現象，可能係造咗淡的大戶正在平倉。點解應跌唔跌代表大戶平倉？因為散戶受市場氣氛影響，特別是外圍的升跌市，美股隔夜大跌，返到香港開市散戶腳軟，氣氛一定差，跟沽者眾，但股市有一賣必有一買，才可成交，咁散戶沽邊個去買？都好可能係大戶做對手。大戶在大市咁插落來都敢買，理由亦好簡單，佢之前高位沽咗，在低位買番嚟平倉。
我通常都會留意在大戶平倉位後，股市有無突然逆轉，若無大逆轉，股市只係慢慢彈吓兼上上落落，我叫呢種情況做自由浮動，即係本來有大手按住個市，後隻手突然移開咗，個市出現失去壓力式反彈，但彈力未必好大。另一個情況好似上周五咁，有大逆轉，突然大幅彈升，咁就唔止失去壓力咁簡單，係一個典型「殺完好友殺淡友」的格局。大戶沽空咗，在低位平倉時，順手做番少少好倉，蝦散戶被盡殺好倉後還未回過神，個市已夾咗上去，將另一批追沽者殺埋。
再行夾高 殺盡淡友
短期走勢係市場先生玩晒，而佢通常係俾大戶操控，無乜主見，亦無乜道理可講。散戶通常認為「唔應該」、「無理由」的事情，偏偏會發生，甚至係特別會發生，這是大戶操控市場先生、食散戶夾棍的結果。所以散戶短炒，要傾聽市場先生的聲音，聽佢講，佢叫你做乜就做乜，唔好鬥氣，唔好話「無理由咁樣」，例如你造咗淡倉，見美股杜指跌兩百點，以為香港一開市要跌400、500點，點知跌得100幾點，等到近收市甚至倒升，你就媽媽聲，話無理由係咁，甚至追沽多兩注。咁做就係無聽市場講嘢，佢都話唔想跌囉，你唔好理乜嘢原因，唔好同佢對着幹就得啦。
當然，市場先生行事都有個譜，佢雖然唔係幾聽「基本因素太太」話，太太叫佢唔好出街玩，佢唔係幾想聽，但佢唔敢太離譜，最後叫佢唔好遲過半夜12點返屋企，佢都會照做，問題係10點返、11點返、定係12點正先至返，佢就睇情況啦，睇吓到時玩到點啦。
以目前的市況，大市向下的勢態未變，短線當然可以炒落也可以炒上，但是以炒落為主，炒上為副，炒落落得多，炒上無上得咁多。港股近期高位係上月頭的23262點，到上星期四跌到21423點低位，有1839點差幅，少少地除頭扣尾都食到1500點，用期指放大去炒已經好好肉，可以食胡。大戶食完胡反手造好，小小地彈500、600點係彈番跌幅三分一，上周五一日已差唔多到，多點彈800、900點係彈番跌幅的一半，升多300點已經好夠，記住這是反彈，升幅有限。當然彈多彈少好睇大戶夾唔夾到造淡的散戶平倉，若散戶好快投降，大戶食胡，反彈市就完，若散戶強橫一點，不排除再夾高一點，派對就會結束。
高盛睇好 大摩看淡
有趣的是兩大美資行大摩和高盛對後市睇法大異其趣。摩根士丹利發表報告話，港股估值不高，經濟展望相對正面，預料香港今年經濟增長可達3.8%，明年可達4.5%，高於多數亞太區國家，佢將年初至今MSCI香港指數盈利預測上調5%，相對MSCI亞太(日本除外)指數盈測下調幅度1.4%，可見港股盈利跑贏同區，但同期股價則落後，今年至今MSCI香港指數僅跑贏MSCI亞太(日本除外)指數1%，遠低過該行預測港股盈利可以跑贏大市的幅度(5%以上)。大摩調升港股評級升至「增持」，在新興市場中排第4位，佢同時亦繼續看好中國，維持中國在新興市場的第2位排位。
不過高盛睇法卻剛好相反，認為中國首季經濟增長較預期低，將今年中國增長(GDP)預測調低至7.8%，佢認為企業盈利增長預測亦要調低，加上內地負債上升，令結構性風險升溫，故將H指目標預測由13700點調低至12400點，雖然12400點相對於上周五收市仍有17%潛在升幅。
我的看法近高盛啲，睇得淡啲，認為即使大摩睇的基本因素未必係錯，但中短期還是要先反映向淡的走勢，因為高盛的講法反映緊外資對中國的情緒，本來都覺得中國有問題，又見到你今年首季GDP唔得，自然會傾向睇淡，兼且資金流出中國等新興國家，流入美國和日本，香港亦一樣等到跌得深啲，先至返來撈底都未遲。或者中國出到好靚數據，證明經濟重拾上升動力時，先至返轉頭都未遲。我成日話要順勢，上半年個勢都係淡，下半年要睇睇中國的數據。
大勢轉移 富士康衰
講起勢，一個市有個勢，一間公司亦有個勢，最近睇到富士康(2038)的新聞，真係擔心佢大勢已去。早前已傳出富士康代工生產的蘋果iPhone 5銷情欠佳，令富士康定單下滑。《中國經營報》又報道，蘋果近來以外觀不合格、功能不佳等理由，向富士康退回500萬部iPhone，另有300萬部質量有問題要重做，富士康因此須花上10至16億元人民幣，令其代工iPhone 5的三分之二利潤蒸發。
我經常講「範式轉移」，即係一行生意取代令一行的生意，智能電話取代個人電腦和傳統電話，係重大的範式轉移，表面睇好以對生產iPhone的富士康有利，其實不然，過去傳統電話的品牌全部由廠家代工生產，唔會自己做，富士康這等巨廠食到應。但智能電話的第一大皇者三星主要是自行生產而非由他人代工，已大大影響了富士康的生意；三星手機銷量全面超越蘋果iPhone ，蘋果股價由去年高位705美元跌到而家400美元唔夠，敗象已呈，本來已對代工iPhone 5的富士康影響很大，如今再傳iPhone 5大幅退機，更是雪上加霜。
有讀者問我揸咗富士康點算？富士康去年7月插過落2.22元，到11月升番上4元樓上，跟住回吐，上周五收2.74元，上落好大。若果佢長線生意差，「基本因素太太」慢慢發揮作用，每次大反彈都係減持或沽空的機會，例如話新iPhone出又會多幾多生意之類，隻股一升就係沽貨的好時機啦。講長線走勢，「市場先生」話唔到事㗎，跟佢玩博反彈，走慢啲命都無。
陸羽仁
上一頁 下一頁
金融High Tea 舊文