金融High Tea 2013年5月2日
金融High Tea——鋤價
2013年5月2日
歐洲央行明天召開議息會議，市場顯得比較謹慎。隔夜美股輕微收高，日韓及歐洲股市個別發展，日本股市跌0.4%，韓國則升1.2%。德意志銀行季度業績理想，德國及英國股市開局造好，唯法國股市偏軟。歐洲股市4月整體上升1%。
你咪睇歐羅區政治唔穩，經濟又疲弱，上日公佈的失業率高達12.11%，刷新紀錄，股市表現卻認真唔弱。斯托克斯歐洲600指數在4月份埋單計數上漲1%，而且係連續第11個單月上漲！道理同美國情況差唔多，經濟唔好，歐洲央行不斷釋出將要降息的訊號，有支大水喉射住，市場對後市有憧憬，唔積極入市但唔願離場，淡友就更加唔敢沽貨，大市就形成陰啲陰啲向上的格局啦。
港股四月份埋單有上升，顯示大市在21500點有支持，傳統上有「五窮六絕」說法，英諺叫sell in May，今年靈唔靈驗好睇阿爺有無招數撐A股。
五一零售股反高潮
五一勞動節股市唞唞，同旅遊業中人傾起，佢哋話今次五一內地唔止假期短，阿爺仲有意控制華東地區的人群唔好走咁多出來，香港遊客生意都靜咗，酒店房間都唔滿。由此估計，節後零售股可能會隊一隊。
以前放假多睇樓活動，政府年初加印花稅打擊炒樓後，?家樓市真係靜過鬼，經紀話五一假都無乜人睇樓，食開白果繼續食。最慘係新樓都受規管售樓新例影響，發展商態度觀望，拖住唔開盤，正所謂唔止二手死，一手都半休眠。代理股美聯(1200)節前升2.9%至3.58元，都唔知升乜。美聯現價仲高達10.3倍市盈率，若然今年盈利有增長，呢啲市盈率唔算貴，問題係靜成咁，除非下半年樓市醒返晒，否則佢點可以保持去年的2.5億盈利？
近期有不少證券行唱淡樓市，例如瑞銀話，政府去年底及今年初兩度推出辣招後，已遏止大部份投資需求，樓市將回歸用家市場，估計今年樓價或跌5%至10%，但短期難改供應短缺，港府不似會收回辣招。瑞銀估計針對用家的中小型住宅受影響較少，比較看好以本地用家為目標和有高資產流轉量的發展商(例如長實這一種？)。
四叔增持過份莫追
另一證券行貝爾斯登對樓市看法更淡，預測今年樓價將跌逾兩成，可能跌20%至25%，其中長實(001)更可能成為劈價賣樓先鋒，以加強售樓力度，佢估在減價潮中，恒地(012)最受影響。
恒地三月中曾見47.8元低位，在其主席李四叔增持聲中，隻股大力反彈，周二收市56.2元，一個半月內從低位反彈17.6%。反觀同期長實只是從低位110.1元升到116.8元，只升6%，恒地係唔係升得過份咗少少？
照計樓市回了一浸，唞幾個月應有反彈，問題係反彈力度有多大。現時不少大行估香港樓市高位已見，換言之即使有反彈，都唔使慌大力，或者只是成交反彈嗰價唔彈。中環茶友話，再係咁無成交，地產經紀跳樓都唔掂，所以佢哋會愈唱愈淡，想大力鋤價，若然迫到放盤業主減價一成以上，平價單位有機會成交得到，講來講去，大家都無信心唔減價樓市成交會好返。
地產股走勢好難和樓市脫節，若然樓市偏淡，唔好期望地產股有驚人表現，恐怕地產股價同樓價一樣，年頭已見高位，唔好見到四、五、六叔增持，就跟風撲埋去啦。
陸羽仁
上一頁 下一頁
金融High Tea 舊文