金融High Tea 2013年5月20日
金融High Tea——改革紅利難分
2013年5月20日
美股不斷創高，美元向上，金匯皆跌，杜指上周五升121點，美股連上高位，但港股好像一隻跟尾狗一樣，無厘神氣，跟升跟得唔足，被外圍拖住跌，又跌唔落去。
上期講到大媽對大戶，話金價急挫，日圓下跌，引得一眾大媽走出來搶金搶日圓，但我認為美元走勢向上，大戶沽非美元資產，大媽咁去搶未必有甜頭，話口未完，美元再升，黃金反彈後再插，紐約期金上周五低見1353美元，日圓跌穿100大關後插穿埋103。黃金早前大插後一度大反彈，升返上1500附近，大媽以為無事入金舖盲搶金，若在這種高位入市，跌到?家差唔多無咗10%，都未計若然要出入仲要付手續費，結論大戶先勝大媽一局。
上周在一個飯局中，遇上一間將來港上市的內地公司老總及他們的賓卡(投資銀行家)和公關，知道佢哋向港交所入咗A1表格，等港交所批准上市，今次先行來香港和去海外做一轉預備路演(向投資者推介公司情況)，到正式批准上市後再來做正式路演及招股。
新股量跌 搵食艱難
舊年市道唔好，新公司都唔敢來港上市，去年香港IPO融資額創三年新低，只有62間新公司上市，首次公開招股募集資金900億港元，比2011年大跌65%，可以用低迷兩個字來形容。陸羽仁和賓卡和公關談起今年的市道，佢地大歎呢兩年好難搵食，講講吓又講到2010年金融海嘯後的「好年頭」，那一年有113間新公司上市，當中包括友邦保險(1299)集資200億美元和農業銀行(1288)集資120億美元，真係旺到不得了，試過那年10月新公司上市高峰期，一個公關一日在酒店走四場招股推介會，四間公司一齊同日上市，公關大哥話去到第四間時，真係唔記得間公司個老總叫「乜總」，只能係咁叫佢做「領導」頂住檔先。講開又講，在2010年新上市咁熱的市況買咗新股，如果唔係友邦、農行呢啲大股，買中貴價中小股又唔識得放的話，揸到家都幾傷。
香港的IPO市場，由高峰期一年百幾間公司上市，跌到去年得番60幾間，仲無晒大型公司，新上市公司都係細嘢為主，靠新上市公司搵食的賓卡、公關、甚至財經報紙，有幾好搵可想而知。
我遇到的擬上市公司老總，間公司仲有一兩個月才上市，佢好關心未來港股市道，問我點睇，我話你哋專家雲集，何需問我？賓卡的答案好審慎，話唔敢睇得太好，估計上半年可能好過下半年，所以催想上市的公司早點招股，唔好以為市道好好慢慢等。公關大佬亦係睇得普通，話估計今年有80間新公司上市，多過去年62間，咁樣已經算好啦，唔敢期望咁高。
抓住機會 上得就上
我搭句口話未來兩三個月新股得唔得，主要睇兩個因素，第一係大市，如今內地拖累港股無乜力，主要靠美股撐，但美股不斷創高後即使長線向上，也可能會回吐，家盛傳美國聯儲局可能在9月開始減少量寬買債的規模，若然發生對股市壓力不低，所以美股也不能直線看好。第二係新股氣氛，?家有兩隻大型新股中石化煉化(2386)和銀河證券(6881)快將掛牌，聽聞佢哋定價唔會高，要睇佢哋上市後股價表現如何，若然有得升，會提振散戶對炒新股的信心，對後來的上市公司有利，若然佢哋一上市就潛水，咁未來新公司上市更難。
目前係只怕香港市場無胃口，不怕無公司來香港上市，內地股市唔好放慢晒上市，如今仲有八百幾間公司在內地排緊隊上市無門，內地稱之為上市「堰塞湖」，要靠到香港上市洩洪。過去阿爺對內地公司到香港上市都有好嚴限制，但去年12月開始放寬，即係所謂取消了境內企業到境外上市的「456條件」，不再設盈利、規模等門檻，簡化了境外上市的申報審核的程序，放多啲公司出來。另外，聞說阿爺見咁多公司排隊上市實在唔好睇，就搞出一個「自審」程序，叫保薦人等上市相關人士再對想上市的公司審查一下，唔夠格的唔好再申請，結果有過百間公司自審完自動出局，阿爺排隊上市的名單「縮短了」，但呢批垃圾公司可能有部份會走埋來香港上市，所以股民買新股要帶眼識股。
內地經濟放慢，外資證券行紛紛調低中國今年經濟增長預測，不過阿爺都不想坐視經濟慢流的困局，路透社引述消息人士話，國家主席習近平最近開始求變，為求打破經濟悶局，親自出馬規劃經改革方案。消息刺激上周五香港假期間的內地股市上升，上證綜指收市升31點，升幅1.4%，收報2282點，預計中美股市皆升的情況下，港股今日可以高開。
高層出招 再搞改革
由於內地的改革方案仍在策劃階段，未有具體內容，傳聞改革方向係針對利率市場化、改革戶籍制度及地方財政體制方面，令地方政府不再依賴賣地作為主要收入。另外內地《財新網》話，由政府高官及政策顧問組成的七個工作小組，正在起草改革方案，包括金融部門、財政體系、土地使用權、生產要素價格、簡化行政審批程式、改善社會收入不公與戶籍制度等領域，與路透社講的方向不謀而合。
我估中國呢次改革意義重大，但即時對股市的刺激有限。要明白阿爺搞邊科，要從中國的經濟現況開始。中國經濟主要由三頭馬車去拉動：出口、投資及消費，過去主要靠出口，因為過去內地大量年輕人口投入勞動市場，廉價勞工成為製造業的主要推動力，這就是所謂「人口紅利」，但隨着歐美市場疲軟，加上阿爺為保穩定，年年加人工，工薪上漲令中國做低檔出口的能力大大減弱，加上內地人口開始老化，「人口紅利」已經食盡，經濟增長開始放慢。出口開始唔夠力，由於內地消費市場還需要時間培養，所以過去經濟一唔掂，就只能加重第三頭馬車：加大投資來救，2008年一役溫總投放4萬億救市，就係一個典型，但最後拉起經濟，也拉高埋通脹，更谷出一個高熱樓市，事後總結呢種救市方式係敗筆。
外資睇淡 轉軚需時
我聽內地高人講，谷投資主要谷基建，但高鐵都起得七七八八，內地可以大筆投資的基建已經唔係好多，想花錢谷投資都唔係咁易。不過總理李克強去年上任前已講過，人口紅利不再，中國可以推動改革，就有「改革紅利」，所以習李班子上台一定會推改革。
聽見高人咁講，順帶講兩句建材股，無怪乎佢地唔係幾得，彈一輪都上唔番兩年前的高位，原來阿爺都認為長線唔係咁多基建可以起，除了基建外，建材股另一大客源係發展商起樓，但阿爺又全力㩒住樓市，發展商都唔敢放開手腳起樓，所以建材股都係炒吓上落，在早兩年高峰期買咗建材股有排未見家鄉。
講番內地經濟改革，現時內容未知，我估都係朝開放市場引入競爭、減低生產成本支援企業、以及推動城鎮化為主，方向都係劏肥豬釋放利益出來，大壟斷性國企如中移動(941)甚至國有銀行將成開刀對象，揸住呢啲股票要留意中國改革的動向。
雖然改革對中國經濟發展有利，但效果唔係咁易睇到，特別外資本來睇淡中國經濟，未必咁快會扭轉過來。每年10月中共會開全體大會，估計經濟改革方案會在那時面世，要炒都要等9、10月開車會易啲，無咁快啟動。短期內地股市都係炒吓上落，升一陣又會回，投資者想分呢啲改革紅利，都唔係咁容易。
陸羽仁
上一頁 下一頁
金融High Tea 舊文