陸羽仁 BLOG 2013年9月11日
看好中國
2013/9/11 上午 09:36:55
網誌分類: 經濟
中國和敍利亞托起美股，美國股民被兩個美國對頭支持，總有點諷剌吧。
美國國務卿克里一句戲言，話敍利亞交出化武就唔打佢，俾俄羅斯食住上，搵到敍利亞承諾交出化武，美國更加出師無名。美國總統奧巴馬昨日話唔肯定能否說服國會議員授權佢對敘利亞動武，又話仍未決定會否在未得到國會支持下採取軍事行動，最後加多句，他對國會的表決及國民的十分重視，顯示奧巴馬對出兵敘利亞的態度，有明顯軟化跡象，美國尋求國際支持向敍利亞出兵失利，都係時候搵下台階收手了。
「敘利亞風波」有望能夠用外交途徑解決，全球投資者唔再擔心打仗，市場投資氣氛即時生番曬。此外，中國繼續公布強勁經濟數據，進一步催穀全球股市。中國昨日公布8月份工業産值較去年同期增長10.4%，好過預期及7月的9.7%；而同期零售銷售更大幅增長13.4%。上證綜指再升1.1%，兩日累積升幅4.5%，中國好對美股亦有支持，美國愈來愈多基金經理認為中國股市已見底。
打仗機會大減，外國經濟改善，股市恐懼指標VIX指數回落至7%至14.5。美股當然唔執輸，繼續炒上。杜指漲127點，收報15191點，連漲六日。工業與金融板塊領漲，能源板塊成為10大板塊當中唯一下跌的一個。原因係中東局勢緩和，原油期貨價格回落至每桶107美元。另外由9月23日開始，杜指成分股將會換馬，由高盛、Visa及Nike取代美國銀行(BOC)，惠普(HP) 及美國鋁業(Alcoa) 。高盛及Visa升超過3%，Nike 亦漲2.2%。
美股反升，傳統智慧有少少失準，5月沽貨，9月淡市暫時都唔得。9月至今美股升2.4%，從5月到10月傳統淡季，標普500指數都升咗4.5%!
昨日另一大新聞係蘋果在加州正式發布兩款新手機iPhone 5c及iPhone 5s。後者係主要針對例如中國等新興市場的平價版iPhone，前者則係更快及具備「Touch ID」指紋掃描，專門用來識別指紋的升級版iPhone。而蘋果股價又再一次引證「有好消息出貨」的典型投資智慧。
據Birinyi Associates的統計，蘋果股價在公司表示將有新產品發布之後的一個月，有91%的時間跑贏標普500指數4.3%；及後的三個月，卻有73%的時間落後標普2.1%，昨日正式宣布，更逆市跌2%至496美元，失守500美元大關。
蘋果新手機該亦將今日在中國大陸推出發售，有分析員指蘋果食粥食飯，主要睇中國的銷情。中移動(China Mobile)係蘋果的最大經銷商。中移動現時有近7.5億用戶，大約佔全球手機用戶的11%！我估香港水貨客聽到呢個消息好唔開胃，中國和香港同步推新機，即係無得炒啦。
有傳聞蘋果甚至願意與中移分享Appstore的業務分成以換取合作，有老外分析師表示，如果雙方能在短期內達成合作協議，蘋果今年第四季將可多出售500萬部iPhone，至明年第四季預料中移可售出1250萬部，明年全年銷量達3870萬部。
國信證券指，中移動能否受惠新iPhone推出，要視乎平價版iPhone賣幾多錢，如果低過2000元人仔，對客戶至有更高吸引力。市場反應好，中移動有機突破百元大關。
另外，正有分析員指出，升級版的「指紋識別」得唔得，亦係是否能夠大賣的因素。打指模代替入密碼，當然好啦，又方便又安全。但如果時得時唔得，就大鑊啦！另外一個幾敏感又相關的問題係：究竟用戶的指紋只係保留在手機上，抑或會上載到蘋果的待服器？「斯諾登風波」，相信大家唔會咁快就忘記啩？
陸羽仁
回應(6) 我想回應
陸羽仁 BLOG 舊文