金融High Tea 2013年9月4日
金融High Tea——壞當好炒
2013年9月4日
港股續升219點，內銀股續漲約2%，美國銀行就借機沽清手上建行(939)股份，市值15億美元(約116億港元)。市場有「大戶沽貨愈沽愈高」之說，因為大戶手上貨多，個市唔好，根本食唔到咁多貨。
據彭博社昨日下午報道，美銀正尋求以最高15億美元出售所持有的建行股份，結束對建行的8年投資。美銀要出售其所持建行餘下20億股股份，配售報價區間為每股5.63至5.81港元，配售價比建行昨天在香港的收市價5.93港元最多低5.1%，建行昨日升了1.9%。有芬佬話，聽聞配股銷情理想，估計全數去貨。
美銀沽貨難測市
建行董事長王洪章上周一仲話希望美銀不要再沽建行，點知話口未完美銀就清貨。雖然王總唔係幾喜歡美銀咁樣沽佢哋，但係市場又唔係咁睇，一來美銀今次是悉售股份，已經沽清，令建行去除頭頂的懸劍。二來由於美銀持有這最後一批建行股份的禁售期剛在上月底完結，近期沽空建行者眾，其實主要就是針對美銀可能沽貨，如今壞消息落實，沽空盤會急急平倉，小心建行下插後回頭反彈也可能好急。
市場另一個議論焦點係美銀沽貨，係唔係意味着建行，以至內銀都短期見咗頂呢？記得今年5月高盛沽工行(1398)，沽完不久港股就插，真係黃大仙都無咁靈，不過美銀眼光似乎無高盛咁好，以對上兩次2011年8月和11月兩度沽建行為例，都唔係沽到高位，所以按往績無乜測市功能。
中環茶友評彈美銀的行動，雖然佢入貨成本好低，在2005年以每股1.065元及2008年以每股2.42元和2.8元入貨，但若覺得股份大有前景，都唔使咁急沽，所以美銀連股建行都沽清，即使唔係對股份短期走勢的睇法，都反映咗中長線睇淡。
睇番昨日個市，連續第四日造好，但在22500點前已經行人止步，恒指其後多次試圖挑戰呢個關口，都無功而回，阻力甚大。恒指收市漲219點，報22394點，漲幅1%；國企指數再度跑贏恒指，漲幅接近2%。
借諾基亞賣盤亂炒
內銀股升市中表現出色，據內地傳媒報道，工行(1398)、農行、中行及建行四大行8月份新增貸款約2500億元人仔，整個銀行業新增信貸規模料約在7800億元，超過上月的6999億。
業內人士解釋，8月份投資略有回暖，一些基建項目陸續開工拉動了貸款需求，預計阿爺唔想經濟過熱，可能會適當控制今個月的信貸投放量。
另一個刺激消息係微軟宣佈將以54.4億歐羅(約560億港元)收購諾基亞的手機業務，諾基亞由全球手機一哥，跌到今天只得番市場一個零頭，俾三星和蘋果砌低晒，搞到賣盤收場，都係三幾年間的事。
市旺乜都借勢炒吓，手機行業股借賣盤消息禾雀亂飛，諾基亞係富智康(富士康)(2038)的主要客戶之一，食正條水，股價抽升5.8%，報5.29元。比亞迪電子(285)及TCL通訊(2618)仲勁，齊漲7%，產銷智慧手機的中國無線(2369)及生產手機照相部件的舜宇光學(2382)升近半成。
乜諾基亞賣咗俾微軟就一定成功咩？呢啲代工商一定做好多生意咩？我就唔覺啦，不過炒股都係借啲意，咁認真你就輸啦。
陸羽仁
上一頁 下一頁
金融High Tea 舊文