陸羽仁 BLOG 2013年10月29日
控制期望
2013/10/29 上午 09:46:42
網誌分類: 經濟
美國投資者觀望美企業績表現之餘，又等待聯儲局議息會議結果。聯儲局今晚開始召開為期兩天的議息會議。不過，市場普遍預期聯儲局不會改變現時的利率政策或者購買資産計劃，估計聯儲局在經濟數據不足，經濟狀況無明顯改善的時刻，將會以不變應萬變，強調保持耐心的重要性，直至美國經濟強勁到可以減少刺激措施，仍能自力更生，才會正式採取退市行動。
經濟數據方面，美國房地産經紀商協會(NAR)宣佈，9月的二手房簽約銷售指數較上月大降5.6%。低過市場預期的與上月持平，而8月則下降1.6%。反映房地產市場有惡化跡象。9月美國工業産出增長0.6%，為今年2月以來最大漲幅，其中以公共設施産出漲幅最大，漲4.4%。而第三季度産能利用率78.3%，創了5年新高，原因係美國整體就業人數縮減，產出量沒有降低的情況下，産能利用率就相對地提升了。
美股反覆靠穩。杜指收市微跌1點，收報15569點，标普500指數漲2點，收報1762點，再創收市歷史新高。
美國第三季業績公布到差不多一半，睇美國大股情況，都可以預測吓香港大股走向，美國今次業績有幾個特點:第一，第三季盈利增長4.5%，已公布業績的公司有67%達到或超過市場預期，好過62%的平均數。但營業額增長只有4%，只有51%達到或超過預期，低於平均。簡單講呢個結果反映美企主要還是靠節流增加盈利，生意唔係做多好多。
第二，由於整體表現唔係咁爆，不同行業在不同季度領先，令股份輪住炒。金融股業績曾有幾個季度領先，如今到非金融類股份跑出，(解釋咗匯控點解由去年大升，到今年只是橫行)，領先股份多是防守性類別，自10月起，電訊、普通消費、公用股全部跑贏標普500指數。金融股只是跟大市，科技、能源和衛生股曾是市場領袖，如今變得落後。(電盈去年全年大升，今年先升後回)
第三，小股跑贏大股。標普小市值600指數今年升33.5%，標普500指數只升23.4%，小公司表現好是經濟緩慢回升的指標。
不過，有市場人士提醒投資者，美股最大隱憂在於「回歸正常」(reversion to mean)，即係返回常態。據過往的統計，標普500指數的每年正常升幅回報係6%至7%(不計股息)，而過去5年，有4年係遠遠超出此平均增長值，2009年係升23.5%、2010年升12.8%、2011年持平、2012年升13.4%、2013年升22.3%。股市今年升咗咁多，明年又可否期望股市大升?
而家標普500指數1760點，明年要升10%是1936點，是分析預計的平均升幅。問題係按標普500指數計今年賺108美元，明年賺多7%係115美元，假設是15.5倍市盈率，即115美元乘15.5，即係1782點，標普500指數只係比而家多20點，即係1.1%。
結論係若非市場狂熱，美股今年升得多，明年唔好咁高期望。同樣道理，如今年底明年初港股和大陸股市抽升，到時就要睇路啦，明年若無美股拉住上，唔好睇得太高，要控制一下自己的期望。
陸羽仁
回應(3) 我想回應
陸羽仁 BLOG 舊文