陸羽仁 BLOG 2014年1月3日
中國放慢
2014/1/3 9:28:44
網誌分類: 經濟
杜指2014年首個交易日跌135點，收16441點，標普500指數跌16點，收報1832點。過去5年內，新年第一個交易日美股都上漲，而且升幅平均都有2%，但今年卻開黑盤，跌約0.8%。意頭就麻麻啦，但係一日的表現唔代表一年的走勢，
S&P/Capital IQ的資深指數分析師Howard Silverblatt表示，據過往經驗，年度首日升跌與標普全年走勢的關係其實只有50%相同，(簡單一點講，五五波即係機率正常分布，亦即是無關係。)而1月份的整體表現比較有指引性。
統計1929年至去年，美股1月份造好有55次，當中有40次或73%，該年股市會造好，而全年有八成的時間都係向上，超過50%的機率就比較有參考價值啦。
有分析員指出美股昨日之所以下跌，主要由歐股帶動，歐股跌，則由中國股市因疲弱的製造業報告引發。滙豐編製的12月中國製造業採購經理人指數(PMI)終值只有50.5，創了3個月新低，雖然指數連續5個月高過50的枯榮分水線，反映中國製造業產出仍在擴張，但增速已放慢。尤其係12月新訂單增長呈收縮現象，新出口訂單指數僅49.1，創4個月新低。
滙豐中國首席經濟學家屈宏斌預期，在通脹仍然溫和情況下，阿爺將會保持現有的貨幣及財政政策以支持經濟成長。去年中國GDP增長7.6%，略超過政府設定目標7.5%，不過仍然係1999年以來最低。據彭博社調查，市場普遍預期今年中國GDP增長率會繼續放慢，只有7.4%。法國東方滙理銀行資深經濟學家高德信(Dariusz Kowalczyk)睇得更淡，認為PMI的下跌顯示中國成長動力觸頂，增速將放緩，中國今年GDP增長將下滑到7.2%。
中國製造業放慢，歐股即時做出反應，新年首日開市即全綫收跌，跌幅亦唔細，法國及德國股市齊跌1.6%。受悲觀的市場情緒影響，美股亦無運行，唔少投資者先行鎖定利潤啦，將資金先放入債市及金市避避。債價升債息跌，美國10年期債息由3.04厘回落到2.99厘，債息跌就令無息收的黃金上漲，跌咗好耐的黃金每安士大漲1.9%至1225美元。
市場普遍睇好美股以至全球股市今年走勢，不過，比較去年，美股今年的回報率將會下降。彭博社最近訪問了20位分析師，對標普500指數到年底的平均預期為1950點，即全年漲幅只有5.5%。另外，又預計今年將有116隻標普500指數成分股下跌，為9年以來最悲觀的預期。
不過，也有分析師樂觀都指出，去年可以講係充滿磨難的一年，「財政懸崖」、政府縮減開支、預算案爭拗導致政府停運、聯儲局退市陰影濃罩，但股市卻一片大好。事實上，從長期睇，股票市場終會轉好。20世紀美國歷經兩次世界大戰和其它大大小小的軍事衝突、大蕭條、多次經濟危機、石油危機、禽流感等等，杜指數仍然從66點漲到了11497點。
長線計危機愈大時股票愈值得買，股神巴菲特曾在2008年紐約時報專欄講過，「壞消息是投資者的良師益友，可以讓投資者有機會以極低價格買入美國資産。」又話有一個簡單的原則支持他買入或者買出，就係「他人貪婪，我恐懼；他人恐懼時，我貪婪。」可惜而家美股無乜壞消喎，巴郡去年股價都增長30%以上，按股神邏輯，呢啲就唔係貪婪的時候啦。相反地咁多人睇衰中國，中國股票睇長線係唔係抵買啲呢?
陸羽仁
回應(2) 我想回應
陸羽仁 BLOG 舊文